Фарғона вилоятида ЙПХ инспекторига 400 доллар пора таклиф қилиб, 300 долларини берган ҳайдовчи қўлга олинди. Бу ҳақда «Дарё»га вилоят ИИБ ахборот хизмати хабар берди.
Маълум қилинишича, 2021 йилнинг 25 март куни вилоят ИИБ ЙҲХБ ходими томонидан Nexia автомашинасини маст ҳолда бошқарган 1978 йилда туғилган фуқаро И.Т.га нисбатан маъмурий баённома тузилиб, автомашина жарима майдончасига вақтинча сақлаш учун жойлаштирилган.
Шундан сўнг фуқаро И.Т. Қўқон шаҳар ИИО ФМБ ЙҲХБнинг маъмурий ҳуқуқбузарлик материалларини кўриб чиқиш бўйича инспектори И.О.га мурожаат қилиб, ўзига нисбатан расмийлаштирилган маъмурий баённомани судга юбормаслик ва ижобий ҳал қилиб бериш эвазига 400 доллар пора таклиф қилган.
Инспектор фуқарони пора бериш жиноят эканлиги ҳақида бир неча маротаба огоҳлантириб, бу йўлдан қайтаришга ҳаракат қилган бўлишига қарамай, фуқаро пора таклиф қилишда давом этган.
Шундан сўнг ЙПХ ходими мазкур ҳолат юзасидан ИИБ бошлиғи номига билдирги орқали мурожаат қилиб, фуқаро И.Т.га нисбатан белгиланган тартибда чора кўрилишини сўраган.
29 март куни инспекторнинг билдиргиси асосида ҳолат юзасидан ИИВ ЎХБ Фарғона вилояти бўйича бўлими ҳамда ҳуқуқни муҳофаза қилувчи идоралар ходимлари билан ҳамкорликда тезкор тадбир ўтказилган. Тадбир давомида фуқаро И.Т. 300 долларни пора тариқасида ЙПХ ходимига берган вақтида ушланган. Пуллар холислар иштирокида далилий ашё тариқасида расмийлаштириб олинган.
Мазкур ҳолат юзасидан терговга қадар текширув ҳаракатлари олиб борилмоқда.
Изоҳ (0)