Oddiy hayot tarzini tanlagan qirollik oilasi a’zolari (foto)

Qirollik oilasi a’zosi bo‘lsa ham, oddiy odamlardek yashashni tanlagan va har kuni ishga borib-kelishdan uyalmaydigan mashhurlar bilan tanishamiz.

Shahzoda Garri

Buyuk Britaniya qirolichasi Yelizaveta II ning nabirasi shahzoda Garri Kaliforniyaning kouching, konsultatsiya va murabbiylik bilan shug‘ullanuvchi BetterUp kompaniyasiga ishga joylashgan. Shuningdek, u Vashingtonda joylashgan, noto‘g‘ri axborot tarqalishiga qarshi kurashga ixtisoslashgan Aspen institutining komissiya a’zosi bo‘lib ham ishlaydi.

Malika Beatris

Malika Beatris Goldsmit universitetining tarix fakultetida tahsil olgan. O‘qishni tugatgandan so‘ng, u Sandbridge venchur kompaniyasida huquqshunos lavozimida ish boshlagan. Keyinchalik esa Afiniti nomli IT-firmada faoliyatini davom ettirgan malika hozirda ushbu firmaning vitse-prezident hisoblanadi.

Malika Yevgeniya

Malika Yevgeniya ham opasi Beatrisdan qolishmaydi. U Nyukasl universitetini tugatgach, mashhur Paddle8 onlayn auksion kompaniyasida ish boshlagan. Hozirda Yevgeniya Londondagi Hauser & Wirth art galereyasini boshqaradi.

Piter Fillips

Malika Annaning o‘g‘li va qirolicha Yelizaveta II ning to‘ng‘ich nabirasi o‘zini turli sohalarda sinab ko‘rishga ulgurgan. Dastlab u Jaguar Racing va Williams Racing avtomobil firmalarida menejer bo‘lib ishlagan. Keyin yetti yil davomida Shotlandiya qirollik bankida ishlagach, 2012-yilda Piter sport tadbirlari bilan shug‘ullanuvchi o‘zining Sports & Entertainment UK Ltd kompaniyasiga asos soldi.

Devid Armstrong-Jons

Malika Margaretning o‘g‘li mebel ishlab chiqarish bilan shug‘ullanadi. Vikont Linli o‘zining Devid Linley nomli firmasini 1982-yilda tashkil qilgan. Hatto Elton Jon va Valentino Garavani ham Yelizaveta II ning jiyani bo‘lmish Devid Armstrong-Jonsdan uy jihozlari sotib olgan.

Frederik Vindzor xonim

2009-yilda aktrisa Sofi Uinklman Maykl Kentning o‘g‘li Frederik Vindzor bilan turmush qurdi va Frederik Vindzor xonimga aylandi. Sofi eri singari ish bilan band bo‘lmaganligi sababli hech kim unga aktrisalik faoliyatini davom ettirishiga to‘sqinlik qilmagan.

Biroq sahnada aktrisa o‘zining qirollik maqomi haqida gapirmaslikni afzal ko‘radi. Bir filmni suratga olish jarayonida esa hatto hamkasblari Sofining qirollik oilasi a’zosi ekanligini bilishmagan.