Сурхондарё вилояти, Шўрчи туманида синглисидан 137 миллион сўмни фирибгарлик йўли билан олиб, қайтармай келаётган акага жиноят иши қўзғатилди. Бу ҳақда вилоят ИИБ матбуот хизмати хабар берди.
2021 йил 26 февраль куни Жарқўрғон туманида яшовчи аёл М.Қ. туман ИИБга ариза билан мурожаат қилган. Унда 2018 йил октябрь ойида Шўрчи туманида яшовчи акаси А.Б. унга ёғ маҳсулотлари савдоси билан шуғулланиб, фойдасидан ҳар ойга 9 миллион сўмдан бериб туришини ваъда қилиб, жами 137 миллион сўм пулларни олиб, берган ваъдасини бажармасдан, ушбу пулларни ўз эҳтиёжлари учун ишлатиб юборганлигини маълум қилган.
20 март куни ўз синглисидан узоқ вақтдан буён фирибгарлик йўли билан олган пулларини қайтариб бермасдан келаётган А.Б.га нисбатан Жиноят кодексининг 168-моддаси 3-қисми «а» банди (кўп миқдорда фирибгарлик) билан жиноят иши қўзғатилган.
Маълумот учун, ушбу моддада белгиланган жиноятни содир этганликда айбли деб топилган шахс БҲМнинг 300 баравари (73,5 миллион сўм)дан 400 баравари (98 миллион сўм)гача жарима ёки 2 йилдан 3 йилгача ахлоқ тузатиш ишлари ёхуд муайян ҳуқуқдан маҳрум этилган ҳолда 5 йилдан 8 йилгача озодликдан маҳрум қилиш билан жазоланади.
Изоҳ (0)