Қашқадарё вилояти маркази Қарши шаҳридаги 56 та маҳалланинг ички кўчалари 67 миллиард сўм эвазига қайта таъмирланади. Бу ҳақда «Дарё»га вилоят ҳокимлиги ахборот хизмати маълум қилди.
Таъкидланишича, бугун, 30 март куни вилоят раҳбари Зоир Мирзаев бу ҳақдаги тақдимот билан танишган.
«Қарши шаҳридаги 56 та маҳалла қарийб 67 млрд сўм эвазига таъмирланади. ‘Обод қишлоқ’ дастури доирасида шаҳарнинг ‘Арабхона’ ва ‘Мағзон’ маҳаллаларидаги ички кўчаларга асфальт ётқизилади», — дейилади ҳокимлик ахборот хизмати тақдим этган ахборотда.
Маълум бўлишича, тақдимотда кўчаларни босқичма-босқич таъмирлаш ишлари йўлга қўйилиб, таъмирланган ёки таъмирланаётган кўчаларни ранглар билан тоифаларга ажратиш таклифи ўртага ташланган.
Вилоят ҳокимлиги ахборот хизматининг қўшимча қилишича, 2021 йил шаҳарда 44 км пиёдалар, 12 км велосипед йўлакчаси қурилади. 23 та кўчага эса ёритиш ускуналари ўрнатилади.
Эслатиб ўтамиз, аввалроқ вилоят ҳокими Зоир Мирзаев Қарши шаҳридаги кўчаларни таъмирлаш учун 79 миллиард сўм керак бўлиши ҳақида Президентга ҳисобот бергани маълум қилинганди.
Изоҳ (0)