O‘zbekistonda nodavlat tibbiyot muassasalariga ham koronavirus infeksiyasiga qarshi pulli emlashni amalga oshirishiga ruxsat beriladi. Bu haqda Koronavirusga qarshi kurashish shtabi a’zosi Nurmat Otabekov “O‘zbekiston 24”ga bergan intervyusida ma’lum qildi.
“Kasallik xavfli bo‘lganlar ro‘yxatiga kiritilmagan kishilar uchun pullik emlash rejali emlash majburiyati bo‘lmagan nodavlat emlash punktlari va tibbiyot muassasalari tomonidan amalga oshiriladi. Tabiiyki, har bir holatda sanitariya-epidemiologiya ta’minoti xizmatining hududiy markazlari tomonidan tashkilotlarning vaksinasiya qilish talablariga qay darajada javob berishini inobatga olgan holda maxsus ruxsatnoma beriladi”, — degan Nurmat Otabekov.
Nurmat Otabekov birinchi navbatda koronavirusga chalingan bemorlarni davolashga ixtisoslashgan muassasalar, tez tibbiy yordam, shoshilinch tibbiy yordam tizimi, yuqumli kasalliklar shifoxonasi, koronavirusga laboratoriya tashxisi bilan shug‘ullanadigan xodimlar va ambulatoriya, poliklinika xizmati xodimlari emlanishini eslatib o‘tgan.
O‘zbekistonda aholini koronavirusga qarshi emlash tadbirlari 2021-yil 1-apreldan boshlanadi. Emlash tadbirlari aprel oyida viloyatlar markazlari va katta shaharlarda boshlanadi, may oyida tuman markazlari va kichik shaharlarda amalga oshiriladi, iyun oyida esa boshqa aholi qatlami emlanadi.
O‘zbekistonda bugungi kunda 1 million 660 ming doza vaksina bor. Ularning 660 ming dozasi COVAX jamg‘armasi tomonidan olib kelingan AstraZeneca vaksinasi, 1 million dozasi O‘zbekiston–Xitoy hamkorligida ishlab chiqilgan ZF-UZ-VAC 2001 vaksinasi.
Aholini ushbu vaksinalar bilan emlash bir paytning o‘zida amalga oshiriladi. Bunda emlanuvchi birinchi emlanishni qaysi vaksina bilan boshlasa, ikkinchisini ham aynan o‘sha vaksina bilan yakunlaydi. AstraZeneca vaksinasi bilan 2 marotaba, ZF-UZ-VAC2001 vaksinasi bilan 3 marotaba emlash ko‘zda tutilmoqda. Ya’ni, vaksinatsiya ikki xil vaksinada ikki xil amalga oshiriladi.
Nurmat Otabekovning o‘zi istalgan vaksina bilan jon deb emlanishini ma’lum qilgan.
Izoh (0)