Жиззах вилоятининг Мирзачўл туманида даврий нашрлар обунаси учун ўтказилган пул маблағлари талон-торож қилингани фош этилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Департаментнинг Мирзачўл туман бўлими томонидан ўтказилган терговга қадар текширувда туман Халқ таълими бўлими ва «Ҳ.Й.» МЧЖ мансабдор шахслари олдиндан тил бириктириб, жамият ҳисоб-рақамига 2020—2021 йиллардаги даврий нашрларга обуна бўлиш учун ўтказилган 192 миллион сўмни таҳририятларга ўтказмасдан, растрата қилиш йўли билан талон-торож қилгани аниқланган.
Ҳолат юзасидан Жиноят кодексининг 167-моддаси (талон-торож қилиш) билан жиноят иши қўзғатилиб, тергов ҳаракатлари ўтказилмоқда.
Аввалроқ Бухорода бандлик маркази мансабдорлари 134 миллион сўм бюджет маблағларини талон-тарож қилгани, фуқаролар номига расмийлаштирилган 215 миллион сўм микроқарзни ўзлаштирган МЧЖ раҳбари ва банк ходимига жиноят иши қўзғатилгани, Фарғонада коммунал тўловлар учун аҳолидан йиғилган 123 миллион сўмни талон-торож қилган шахсларга жиноят иши қўзғатилгани ҳақида хабар берилган эди.
Изоҳ (0)