Buxoroda bandlik markazi mansabdorlari 134 mln so‘m budjet mablag‘larini talon-taroj qilgani ma’lum bo‘ldi

Buxoro shahar bandlikka ko‘maklashish markazining mansabdor shaxslari boshqa shaxslar bilan til biriktirib, hujjatlarni soxtalashtirish orqali 134 million 200 ming so‘mni talon-taroj qilgani ma’lum bo‘ldi. Bu haqda “Daryo”ga viloyat IIB axborot xizmati rahbari Shuhrat Jalolov ma’lum qildi.

Ta’kidlanishicha, viloyat IIBga Buxoro shahar aholi bandligiga ko‘maklashish markazi mansabdorlari boshqalar bilan til biriktirib, talon-tarojlikka yo‘l qo‘ygani haqida murojaat kelib tushgan.

Jinoyatchilikka qarshi kurashish zarbdor oyligi doirasida murojaat yuzasidan viloyat IIB xodimlari hamda huquqni muhofaza qiluvchi organlar tomonidan tergovga qadar tekshiruv o‘tkazilgan.

Tekshiruv davomida Buxoro shahar aholi bandligiga ko‘maklashish markazining mansabdor shaxslari, o‘zga shaxslar bilan oldindan jinoiy til biriktirib, o‘zlari va yaqin tanishlarining nomiga 5 ta xo‘jalik yurituvchi subyekt tashkil qilgani va shu orqali ishsiz fuqarolar payvandlash, tikuvchilik va sartaroshlik kasblariga o‘qitilganligi hamda ularga stipendiyalar tayinlangani yuzasidan hujjatlar rasmiylashtirgan.

Mazkur jinoyatga qo‘l urib, hujjatlarni soxtalashtirganlar ishsiz fuqarolarga ajratiladigan issiqxona sellofanlari va ko‘chatlarni yetkazib bermasdan, 134 million 200 ming so‘m budjet mablag‘larini rastrata qilish yo‘li bilan talon-toroj qilgan.

Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 209-moddasi (mansab soxtakorligi) bilan jinoyat ishi qo‘zg‘atilib, tergov harakatlari o‘tkazilmoqda.