Indoneziyaning neftni qayta ishlovchi Pertamina Balongan zavodida sodir bo‘lgan yong‘in oqibatida besh kishi qattiq kuyish, 15 kishi yengil jarohat oldi. Bu haqda “Interfaks” xabar berdi.
Zavoddagi portlash natijasida kelib chiqqan yong‘in sababli G‘arbiy Yava provinsiyasining Balongan qishlog‘idan 950 nafar mahalliy aholi evakuatsiya qilindi.
“Taxminan 200 kishi Indramayu okrugining faollar zaliga, 400 kishi Indramayu Islom markaziga va 350 kishi sport zaliga evakuatsiya qilindi”, — deyiladi zavod matbuot xizmatida.
OAV ma’lumotlariga ko‘ra, portlashning ehtimoliy sababi chaqmoq bo‘lishi mumkin — voqea sodir bo‘lgan paytda kuchli momaqaldiroq bo‘lgan.
“Boshlang‘ich ma’lumotlarga ko‘ra, besh kishi kuchli darajada kuygan”, — deb xabar berdi Indramayu Chaya okrugining tabiiy ofatlarni boshqarish bo‘yicha mintaqaviy boshqarma rahbari vazifasini bajaruvchisi.
Uning so‘zlariga ko‘ra, jami 20 kishi jabrlangan. Besh kishi jiddiy, 15 kishi yengil jarohat olgan. Ularning barchasi eng yaqin shifoxonaga yetkazilgan.
Uning aniqlik kiritishicha, jabrlanganlar orasida uyi zavod yaqinida joylashgan mahalliy aholi va o‘tkinchilar ham bor.
Yong‘inga sabab bo‘lgan portlash 29-mart kuni tunda G‘arbiy Yava provinsiyasining Indramayu tumanidagi Balongan neftni qayta ishlash zavodida kelib chiqqan.
Ijtimoiy tarmoqlarda e’lon qilingan portlash tasvirlarida olov va qora qalin tutunning osmonga ko‘tarilganini ko‘rish mumkin.
Ta’kidlanishicha, portlash ovozi neftni qayta ishlash zavodidan 10 kilometrgacha bol‘gan masofada ham eshitilgan.
https://twitter.com/seatodaynews/status/1376339683777466369
Avvalroq Meksikada shimoliy Kouela va Nuevo-Leon shtatlari chegarasida sodir bo‘layotgan yirik o‘rmon yong‘ini tufayli 1100 kishi evakuatsiya qilingani haqida xabar berildi. 23-mart kuni boshlangan yong‘in oqibatida taxminan 8 ming gektar, jumladan, Kouela shahridagi 3,8 ming gektarga yaqin o‘rmon yo‘q qilingan.
Shuningdek, Mumbaydagi Dreams Mall savdo markazida joylashgan koronavirus bemorlari davolanayotgan Sunrise Hospital shifoxonasida sodir bo‘lgan yong‘in oqibatida 10 kishi halok bo‘ldi. Mumbay meri Kishori Pednekar voqea yuzasidan batafsil surishtruv ishlari olib borilishiga va’da berdi. Shuningdek, u yuqumli kasalliklar shifoxonasining savdo markazida joylashganini birinchi marta ko‘rayotganini ta’kidladi.
Izoh (0)