Misrda ikkita yo‘lovchi poyezdining o‘zaro to‘qnashishi oqibatida kamida 32 nafar odam halok bo‘ldi, yana 91 kishi turli darajadagi tan jarohatlari oldi. Bu haqda Al Jazeera xabar qilgan.
To‘qnashuv 26-mart kuni mamlakat janubidagi Soxag hududida sodir bo‘lgan. Halokat joyiga 60 ga yaqin tez yordam mashinalari yuborilgan, ular avariya oqibatida jarohat olganlarni yaqin atrofdagi shifoxonalarga yetkazgan.
Poyezdlarning u qadar katta tezlikda harakatlanmagani biri boshqasining ortidan yurgani ma’lum qilingan. To‘qnashuvdan keyin ikkita vagonga jiddiy talafot yetgan, ularning biri ag‘darilib qolgan.
Misr temiryo‘llar boshqarmasining axborotiga ko‘ra, poyezdlardan biri Luksor—Aleksandriya yo‘nalishida noma’lum shaxslar tomonidan stop-kran mexanizmi ishga tushirilishi oqibatida to‘xtagan.
Bu vaqtda to‘xtab qolgan poyezdni ortdan kelayotgan boshqa bir Asuan—Qohira yo‘nalishidagi poyezd kelib urgan. Ushbu tarkib mashinisti o‘z vaqtida poyezdni to‘xtata olmagan, oqibatda mudhish halokat sodir bo‘lgan. Birinchi poyezdning oxirgi ikki vagoni, ikkinchisining esa teplovoz qismiga zarar yetgan.
Sodir bo‘lgan halokatning surishtiruv ishlarini maxsus texnik komissiya taftish qiladi. Misr prezidenti Abdul Fattoh as-Sisi avariyaning sodir etilishida aybdor bo‘lgan shaxslarni qilmishiga yarasha jazolash zarurligini ta’kidlagan.
Misrda poyezdlar to‘qnashuvlari avval ham tez-tez sodir bo‘lgan, xususan 2017-yilda Misrning Iskandariya shahrida ikki poyezdning to‘qnashib ketishi oqibatida 36 kishi, 2019-yilda mamlakat shimolidagi va Qohira vokzalida yuz bergan 2 ta avariyada 28 kishi halok bo‘lgan. Shuningdek, 2019-yilda Pokistonninh Panjob viloyatida temiryo‘l poyezdida yong‘in chiqishi oqibatida 60 dan ziyod odam hayotdan ko‘z yumgandi.
Izoh (0)