Қашқадарё вилоятининг Қарши шаҳрида ИИБ ҳамда Миллий гвардия ходимлари учун мўлжалланган янги кўп қаватли уй фойдаланишга топширилди. Бу ҳақда хабар берган «Дарё» мухбирининг ёзишича, вилоятда бундай хонадонлар сони олтитага етган.
«Умумий қиймати 4 миллиард 805 миллион сўм бўлган беш қаватли, 30 хонадонли янги уй вилоятдаги ИИБ ҳамда Миллий гвардия ходимлари учун қуриб битказилган бўлиб, янги хонадонлар Наврўз байрами муносабати билан тантанали равишда фойдаланишга топширилди», — дейди «Қишлоққурилишинвест» МЧЖ инжиниринг компаниясининг Қашқадарё вилоят филиали директори Қўйли Нарзуллаев.
Мазкур уй очилишида иштирок этган вилоят ИИБ бошлиғи Шуҳрат Сотволдиев кўп қаватли турар жой вилоятда ИИБ ходимлари учун қуриб битказилган олтинчи уй эканини таъкидлаб, Президент Шавкат Мирзиёев томонидан соҳа ходимларига қаратилаётган эътибордан мамнунлигини билдирди.
Эслатиб ўтамиз, аввалроқ 2017—2020 йилларда вилоятда «Қишлоққурилишинвест» МЧЖ инжиниринг компанияси буюртмаси асосида раҳбар ходимлар учун 175 та, Мудофаа вазирлиги ҳарбий хизматчиларига 264 та, ФВВ ҳарбийларига 30 та, Миллий гвардия ходимларига 75 та, ИИБ ходимларига 135 та, ДХХ ҳарбийлари учун 210 та, ёш оилалар учун 150 та, оғир ижтимоий аҳволга тушиб қолган аёллар учун 264 та, профилактика инспекторлари учун 568 та турар жой қурилиб, фойдаланишга топширилгани хабар берилганди.
Изоҳ (0)