Jahon sog‘liqni saqlash tashkiloti (JSST) Tojikistonda poliomiyelit (bolalardagi miya yarim falaji) bilan kasallanish bo‘yicha bir nechta holatlarni qayd etdi. Bu haqda tashkilotning rasmiy saytiga tayanib, “Asia-Plus” xabar berdi.
JSST xabar berishicha, 18-mart holatiga ko‘ra, Tojikistonda aylanma vaksinadan kelib chiqqan 2-turdagi poliovirusga (AVKP2) chalingan bolalarda falajlik kelib chiqqan to‘rtta holat kuzatilgan. Shuningdek, bemorlar bilan muloqotda bo‘lgan bir qator kishilarda ham AVKP2 holatlari aniqlangan.
“O‘tkir falajlikka olib keladigan AVKP2 birinchi bo‘lib 2020-yil 22-noyabrda Xatlon viloyatida qayd etildi, ushbu kasallik hozirgi kunda Pokistonda uchraydigan virus turi bilan bog‘liq”, — dedi JSST.
“8-mart kuni Hisor shahri hududida falajlikka olib kelgan yana ikkita AVKP2 tasdiqlandi. Bundan tashqari, mazkur kasallik Dushanbedagi yangi tashkil etilgan kuzatuv punktida olingan uchta ekologik namunada ham aniqlandi”, — deyiladi tashkilot hisobotida.
Favqulodda holat e’lon qilinishi
JSST Tojikistonda aniqlangan AVKP2 holatlari to‘g‘risidagi ma’lumotlarni ko‘rib chiqdi va mazkur epidemiyani ikkinchi darajali favqulodda holat deb tasnifladi.
Ushbu ikkinchi darajali favqulodda vaziyat qo‘shni mamlakatlarga ham tarqalmoqda, shu sababli qo‘shni davlatlar istalgan vaqtda poliomiyelitning oldini olish, aniqlash va davolashga tayyor bo‘lishi kerak.
Ayni paytda ushbu yuqumli kasallik yuzasidan to‘liq tekshiruv olib borilmoqda, jumladan, kasalxonaga yotqizish, kontaktlarni aniqlash va submilliy darajadagi emlashni qamrab oluvchi ma’lumotlar ko‘rib chiqilmoqda.
Kasallikni yuqtirish bo‘yicha hozirgi yoki avvalgi holatlarni aniqlashtirish uchun mamlakatda kuzatuv choralari kuchaytirildi, xususan, atrof-muhitdagi poliovirusni kuzatish tizimi yaratildi.
JSST Poliomiyelitni yo‘q qilish bo‘yicha global tashabbus (GPEI) va sog‘liqni saqlash idoralari bilan hamkorlikda AVKP2 virus zanjirini uzish uchun poliomiyelitga qarshi yangi vaksina nOPV2 bilan qo‘shimcha emlash kampaniyasiga tayyorgarlik ko‘rmoqda.
JSST ta’kidlashicha, poliomiyelitga qarshi ushbu vaksina kuchli ichak immunitetini ta’minlaydi, poliovirus aynan ichakda ko‘payadi.
Ammo immunizatsiya darajasi past bo‘lgan populatsiyada, emlanmagan bolaning birinchisidan ikkinchisiga virus uzoq vaqt (ko‘pincha 12—18 oy) davomida tarqalishi sababli, virus mutatsiyaga uchrashi hamda yovvoyi poliovirus singari falajlikka olib kelishi mumkin. Ushbu mutatsiyaga uchragan poliovirus keyinchalik mahalliy populyatsiyalarga tarqalishi mumkin, natijada AVKP2 paydo bo‘ladi.
AVKP2 virusining tarqalishi global miqyosda 2019-yil boshidan boshlab keskin oshdi. 2020-yilda ushbu virus bilan kasallanish holati Afg‘onistonda aniqlandi, keyinchalik Tojikiston, Turkmaniston va O‘zbekistonga yaqin hududlarda qayd etildi.
Eslatib o‘tamiz, Tojikistonda 22-martdan aholini koronavirusga qarshi emlash boshlandi. Xabarga ko‘ra, birinchi bo‘lib sog‘liqni saqlash vaziri Jamoliddin Abdullozoda, uning o‘rinbosari Samariddin Alizoda va YuNISEFning Tojikistondagi vakili Osama Makkavi Kogali emlandi.
Izoh (0)