So‘nggi bir kecha-kunduzda yuz bergan koronavirus bilan bog‘liq eng muhim xabarlar — “Daryo” koronadayjestida.
Ukrainaning Odessa viloyatida harbiy ayol koronavirusga qarshi emlanganidan keyin vafot etdi. OAVlarga ko‘ra, u Covishield vaksinasini qabul qilgan, bu Hindistonda ishlab chiqarilgan AstraZeneca dorisidir. Ukraina prezidenti Vladimir Zelenskiy esa avvalroq vaksinadan keyin tromblar paydo bo‘lishi haqidagi xabarlarni axborot hujumi deb atagan edi.
Harbiy xizmatchi ayol xizmatdan tashqari vaqtda hushini yo‘qotgan. Harbiy va noharbiy shifokorlar unga yordam berishga uringan, ammo uning hayotini saqlab qola olmagan. Ayol 21-mart kuni emlangan. Ta’kidlanishicha, harbiy xizmatchi gipertonik kasallikdan azob chekkan.
“Strana.ua” nashriga ko‘ra, ayol qon quyulib qolishidan vafot etgan.
Moldovada ham AstraZeneca vaksinasi bilan emlangan erkak ikki kundan keyin vafot etgan. Vaksinadan keyin bir kecha-kunduz davomida unda hech qanaqa ikkilamchi ta’sirlar qayd etilmagan. Bir sutkadan keyin uning qon bosimi ko‘tarilgan. Erkakka o‘tkir koronar sindrom tashxisi qo‘yilgan, kasalxonaga olib borish paytida ahvoli og‘irlashgan, uni qayta jonlantirish iloji bo‘lmagan. Dastlabki ekspertizaga ko‘ra, o‘limga yurak-qon tomir yetishmovchiligi sababchi bo‘lgan.
Jahon sog‘liqni saqlash tashkiloti ma’lumotlariga qaraganda, COVID-19’ga chalinish bo‘yicha yangi holatlar so‘nggi bir haftada avvalgi 7 kunga nisbatan 8 foizga, o‘limlar esa 3 foizga ko‘paygan.
“Butun dunyoda koronavirus bilan kasallanish holatlari ketma-ket to‘rtinchi hafta ham o‘sishda davom etdi, so‘nggi bir haftada qariyb 3,3 millionta yangi holat qayd etildi. Ayni vaqtda olti hafta davomida kamaygan o‘lim holatlari cho‘qqiga chiqdi, 60 mingdan ortiq odam vafot etdi”, — deyiladi JSST xabarida.
Virusni yuqtirish holatlarining eng ko‘p o‘sishi Janubi-Sharqiy Osiyoda kuzatildi, u yerda bir haftada kasallanganlar soni 49 foizga oshdi.
Dunyoda jami kasallanish holatlari 122,5 milliontaga, o‘limlar esa 2,7 milliontaga yetdi.
Koronavirusning yangi shtammlari tarqalishda davom etmoqda. “Britancha” shtamm 125 ta (bir haftada yana 7 ta mamlakatda aniqlangan), “janubiy afrikacha” shtamm — 75 ta (+11), “braziliyacha” shtamm esa 41 ta (+3) mamlakatda aniqlangan.
Belgiyaning Lyej shahrida koronavirusning yangi mutatsiyasi aniqlandi, Belgiyada tadqiq qilingan koronavirusga chalinish holatlarining 4 foizi shu shtamm hissasiga to‘g‘ri keladi.
Fransiyaning “Figaro” gazetasi yozishicha, yangi shtamm o‘zini boshqalariga qaraganda o‘zgacha tutmoqda. Odatda DNK bo‘laklari nusxalar tomonidan yo‘qotiladi. Belgiya variantida esa, aksincha, ko‘plab qo‘shimchalarni to‘plamoqda.
Yangi shtammning yuqumlilik va xavflilik darajasi hozircha noma’lum. U intensiv davolanish bo‘limlarida emas, ambulator davolanish bo‘limidagi bemorlarda aniqlangan. Uning vaksinalarga nisbatan barqarorlik darajasi ham aniqlanganicha yo‘q.
Ushbu mutatsiya Belgiyada yanvar oyida aniqlangan, ammo u Afrikadan, u yerdan uchib kelgan yo‘lovchilar bilan birga kelgan bo‘lishi ham mumkin.
Shuningdek:
- Niderlandiyada umummilliy karantin hukumat qarori bilan 20-aprelgacha uzaytirildi. Bu mamlakatda epidemiologik vaziyatning qiyinlashuvi munosabati bilan amalga oshirildi. Bundan tashqari, hukumat niderlandiyaliklarga 15-mayga qadar mamlakat hududidan chiqmaslikni tavsiya qilmoqda. Ayni vaqtda komendantlik soati qisqartirilib, endi u mahalliy vaqt bilan 21:00 da emas, 22:00 da boshlanadi.
- Norvegiyada politsiya o‘tgan oy o‘z tug‘ilgan kunini nishonlab, karantin qoidalarini buzgan bosh vazir Erne Solbergni so‘roq qilmoqda. Huquq-tartibot organlari surishtiruvni shu hafta yakunlamoqchi. Solberg 60 yoshini tog‘ kurortida nishonlagan. Uning yubileyiga 13 kishi kelgan, hukumat farmoni bo‘yicha esa 10 kishidan ortiq odam ishtirokida tadbirlar o‘tkazishga ruxsat berilmaydi. Bosh vazirning o‘zi karantin qoidalarini buzgani uchun uzr so‘radi. U 1165 dollar jarimaga tortilishi mumkin.
- koronavirusga qarshi vaksinatsiyalarning 76 foizi bor-yo‘g‘i o‘nta mamlakat hissasiga to‘g‘ri keladi. Boy mamlakatlarda ushbu dorilarga talab kattaligi sababli COVAX mexanizmi orqali COVID-vaksinalar yetkazib berilishi xavf ostida qolmoqda, dedi JSST rahbari Tedros Gebreyesus. Ayni paytgacha 459 millionta vaksinatsiya amalga oshirilgan. COVAX mexanizmi orqali esa 57 ta davlat va iqtisodiyotga 32 milliondan ortiq dozada vaksina yetkazilgan.
Izoh (0)