Qirg‘iziston Oliy sudi prezident vazifasini bajarayotgan mamlakat bosh vaziri Sadir Japarovga nisbatan jinoyat ishini qayta ko‘rib chiqdi, deb xabar bermoqda “Interfaks”.

Foto: “TASS”

“Oliy sud hay’ati 2012-yilda hokimiyatni kuch bilan egallab olishga urinish ishi ayblovi bo‘yicha ishni qayta ko‘rib chiqdi. Sadir Japarov jinoyat tarkibi bo‘lmagani sababli oqlandi”, — deya ma’lum qilishdi sudda.

Sud matbuot xizmatiga ko‘ra, shuningdek, ushbu ish bo‘yicha deputat Talant Mamitov va Qirg‘iziston davlat milliy xavfsizlik qo‘mitasi raisi Qamchibek Tashiyev ham oqlangan.

“Oliy sudning 2013-yil 6-avgustdagi qarori bekor qilindi. Oliy sud hay’ati Bishkek shahar sudining 2013-yil 17-iyundagi oqlov hukmini kuchda qoldirdi”, — deya ta’kidlandi sudda.

Sadir Japarov 2012-yilda “Ata-Jurt” partiyasining parlamentdagi fraksiyasi yetakchisi bo‘lgan vaqtda parlamentning o‘sha vaqtdagi vitse-spikeri Talant Mamitov va deputat Qamchibek Tashiyev bilan birga muxolifat namoyishi vaqtida parlament binosi panjarasini shturm qilishga uringani uchun hibsga olingan edi.

Prokuratura ularni “hokimiyatni kuch bilan egallab olishga urinish”da ayblab, ularga nisbatan 10 yilga ozodlikdan mahrum etish jazosini tayinlashni talab qilgan. Biroq Bishkek shahar sudi deputatlarni to‘liq oqlagan. Keyinroq Oliy sud muxolifatchilarga 1 yildan 1,5 yilgacha ozodlikdan mahrum etish jazosini tayinlagan va jazo muddati amalda o‘tab bo‘lingani sababli ularni sud zalidan ozod etgan. Sud qarori Qirg‘iziston Markaziy saylov komissiyasiga ayblanuvchilarni deputatlik mandatlaridan mahrum qilish imkonini bergan.

Avvalroq Qirg‘iziston prezidenti vazifasini bajaruvchi Sadir Japarov qonunchilikka o‘zgartirish kiritilsa, prezident saylovlarida ishtirok etishga tayyorligini aytgan edi.

Eslatib o‘tamiz, 15-oktabr kuni Jeenbekov 10 kun davom etgan norozilik namoyishlaridan keyin Qirg‘iziston prezidentligi lavozimidan iste’fo bergandi. 16-oktabr kuni parlament majlisida qonunchilik kengashi spikeri Kanat Isayev davlat rahbarining vazifalarini vaqtincha bajarishni rad etgan. Yakunda bosh vazir Sadir Japarov prezident vazifasini bajaruvchiga aylandi.

Dastlabki ma’lumotlarga ko‘ra, prezidentlikka saylovlar 17-yanvar kuni bo‘lib o‘tadi.