Қирғизистоннинг собиқ бош вазири ва президентликка собиқ номзод, тадбиркор Омурбек Бабановга қарши судга оширилган ишлар тўхтатилди. Бу ҳақда мамлакат Миллий хавфсизлик давлат қўмитасига таяниб, «Коммерсантъ» хабар берди. Шу билан бирга, Бабанов «ихтиёрий ёрдам сифатида» давлат бюджетига 100 миллион сом (қарийб 1,2 миллион доллар) хайрия қилади.
«Қирғизистон Республикаси Парламентининг собиқ депутати ва Қирғизистон Республикаси президентлигига номзод Омурбек Бабанов ва унга алоқадор тижорий тузилмаларига нисбатан илгари прокуратура ва тергов бўлинмалари томонидан қўзғатилган жиноят ишларининг тергов натижаларига кўра, Омурбек Бабанов ва унинг қариндошлари ўз хатти-ҳаракатлари билан давлат, юридик шахслар ва фуқароларнинг манфаатларига зарар етказишига оид далиллар топилмагани туфайли жиноий ишни ёпиш бўйича қонун ҳужжатларига асосланган процессуал қарорлар қабул қилинди», — дейилади қўмита хабарида.
Бабановга қарши жиноий ишларнинг очилиши
«Республика» партияси етакчиси Омурбек Бабанов 2017 йилда президентликка номзодини қўйишини эълон қилди. У бутун сайлов кампанияси давомида мамлакатнинг ўша пайтдаги раҳбари Алмазбек Атамбаев қўллаб-қувватлаган Сўронбой Жээнбековнинг асосий рақиби эди.
Жээнбеков собиқ бош вазирни теледебатлардан бирида қамоққа олишга ваъда берган. Сайловолди пойгада Бабановга қарши иккита жиноий иш очилган. Сайловлардан сўнг Қирғизистон Бош прокуратураси уни конституциявий тузумни зўравонлик билан ўзгартиришга чақирганлик ва оммавий тартибсизликларни уюштирганликда айблаб, унга қарши жиноий иш қўзғатган.
Сайловда Жээнбековга ютқазиб қўйган Бабанов мамлакатдан чиқиб кетди ва сиёсатни бутунлай тарк этди. Кейинчалик у қайтиб келиб, Атамбаев ва Жээнбеков томонидан оиласига таҳдид қилингани сабабли мамлакатни тарк этишга мажбур бўлганини айтди.
Қирғизистоннинг энг бой одамлардан бири Омурбек Бабанов 2017 йилдан Москвада яшаган ва 2019 йилда мамлакатга қайтиб келиб, сиёсатга қайтмасликка ваъда берган. Бабановнинг сўзларига кўра, ушбу ваъдаси учун ҳукумат унга қарши очилган жиноий ишни тўхтатишга ваъда берган.
Бабанов 2020 йилнинг октябрь ойида бош вазир бўлиш учун сиёсатга қайтишга уриниб кўрди, аммо 9 октябрь куни Садир Жапаров тарафдорлари билан ўтган тўқнашувдан сўнг, ўз номзодидан воз кечди. Бабанов Жапаровнинг бош вазир лавозимига номзодини қўллаб-қувватлаганидан сўнг, унга алоқадор «Республика» партиясининг аъзоси Руслан Казакбаев ташқи ишлар вазирлигининг раҳбари бўлди.
2021 йил 7 январда Бабанов Миллий хавфсизлик давлат қўмитасига сўроқ қилиш учун чақирилгани маълум бўлди. Сўроқдан чиққач, Бабанов мазкур қўмитага ташрифи президент Сўронбой Жээнбеков даврида қўзғатилган жиноий ишлар билан боғлиқлигини айтди.
Изоҳ (0)