Fransiya prezidenti Emmanuel Makron aholini koronavirusga qarshi emlash imkoniyatlarini maksimal darajada oshirishga chaqirdi. Emlash markaziga tashrifi davomida Makron vaksinatsiya “maksimal” bo‘lishi va haftaning yetti kunida “ertalab, tushdan keyin va kechqurun” o‘tkazilishi kerakligini aytdi, deb yozmoqda “Interfaks”.
“Vaksinatsiya uchun hafta oxiri yoki ta’til kunlari bo‘lishi shart emas”, — dedi Fransiya rahbari.
Shuningdek, u 27-mart, shanba kunidan boshlab Fransiyada 70 yoshdan oshgan odamlar koronavirusga qarshi emlanishi mumkinligini ma’lum qildi. Bungacha 65 yoshdan 74 yoshgacha bo‘lgan odamlar, agar ularda kasallik mavjud bo‘lsagina, emlanishi mumkin edi.
“Interfaks” xabariga ko‘ra, fransiyalik shifokorlar mamlakatda koronavirusining tarqalishini oldini olish uchun choralar yetarli emas deb hisoblamoqda.
“Aslida, bu to‘liq lokdaun emas. Umuman olganda, biz ko‘plab do‘konlarni yopdik, ammo boshqa nima qildik?... Rostini aytsam, odamlar hayotida katta o‘zgarishlarni ko‘rmayapman ”, — dedi fransiyalik epidemiolog Katrin Xill.
“Sog‘liqni saqlash tizimi ko‘plab hududlarda, ayniqsa, Il-de-Fransda allaqachon holdan toygan”, — deb qo‘shimcha qildi u.
Garsh shahridagi kasalxona shifokori Benjamin Davido, o‘z navbatida, “yangi choralar kasalxonaga yotqizishlar sonining pasayishiga olib kelishini ko‘rish uchun 14-21 kun vaqt ketishini” ta’kidladi. “Ammo muammo shundaki, hozirda bemorlarimiz soni 2020-yil oktabr oyidagi ikkinchi to‘lqinning eng yuqori cho‘qqisida kasalxonaga yotqizilganlar sonidan oshib ketgan”, —dedi u.
Parijdagi “Bisha” kasalxonasining reanimatsiya bo‘limi boshlig‘i Jan-Fransua Timsi ham mavjud vaziyatdan jiddiy tashvishlanmoqda. “Joylarning hammasi liq to‘lgan... Yangi bemorlarni qabul qilish juda mushkul masala”, — deb ta’kidladi u.
O‘tgan dam olish kunlaridan boshlab Fransiyaning bir qator hududlarida yangi cheklov choralari amal qilmoqda. Umuman olganda, cheklovlar 16 ta hududdagi 21 million kishini qamrab olgan.
Ularga qarindoshlar bilan aloqalarni cheklash, shuningdek, masofadan turib ishlash rejimiga o‘tish tavsiya qilingan. Ochiq joyda sayr qilish va xarid qilish uchun uydan 10 kilometrdan uzoq bo‘lmagan masofada tashqariga chiqishga ruxsat beriladi. Bir hududdan boshqasiga jiddiy sababsiz sayohat qilish taqiqlanadi.
Fransiya hukumati ushbu hududlardagi maktablar, bolalar bog‘chalari va boshqa ta’lim muassasalarining faoliyatini cheklamaslikka qaror qildi. Yangi chora-tadbirlar doirasida hayotiy zarur ahamiyatga ega bo‘lmagan mahsulotlarni sotuvchi do‘konlarning deyarli barchasi yopildi.
Parij OAVning xabariga ko‘ra, bunday “cheklangan” blokirovka Emmanuel Makronning yangi qat’iy cheklov choralariga qarshi chiqqanidan keyin joriy qilingan: Makronning fikriga ko‘ra, aholi uchun, ayniqsa, metropoliten mintaqasida bunday sharoitlarga dosh berish qiyin bo‘lgan.
Avvalroq Fransiyada koronavirusni aniqlovchi testlar sotila boshlashi haqida xabar berilgandi. Xabarga ko‘ra, aholi ushbu testlarni dorixona va supermarketlardan sotib olishi mumkin.
Jons Hopkins universiteti ma’lumotlariga ko‘ra, pandemiya boshidan beri Fransiyada 4 358 910 kishida koronavirus aniqlangan, ulardan 92 776 nafari kasallikdan vafot etgan.
Izoh (0)