Франция президенти Эммануэль Макрон аҳолини коронавирусга қарши эмлаш имкониятларини максимал даражада оширишга чақирди. Эмлаш марказига ташрифи давомида Макрон вакцинация «максимал» бўлиши ва ҳафтанинг етти кунида «эрталаб, тушдан кейин ва кечқурун» ўтказилиши кераклигини айтди, деб ёзмоқда «Интерфакс».
«Вакцинация учун ҳафта охири ёки таътил кунлари бўлиши шарт эмас», — деди Франция раҳбари.
Шунингдек, у 27 март, шанба кунидан бошлаб Францияда 70 ёшдан ошган одамлар коронавирусга қарши эмланиши мумкинлигини маълум қилди. Бунгача 65 ёшдан 74 ёшгача бўлган одамлар, агар уларда касаллик мавжуд бўлсагина, эмланиши мумкин эди.
«Интерфакс» хабарига кўра, франциялик шифокорлар мамлакатда коронавирусининг тарқалишини олдини олиш учун чоралар етарли эмас деб ҳисобламоқда.
«Аслида, бу тўлиқ локдаун эмас. Умуман олганда, биз кўплаб дўконларни ёпдик, аммо бошқа нима қилдик?... Ростини айтсам, одамлар ҳаётида катта ўзгаришларни кўрмаяпман », — деди франциялик эпидемиолог Катрин Хилл.
«Соғлиқни сақлаш тизими кўплаб ҳудудларда, айниқса, Ил-де-Францда аллақачон ҳолдан тойган», — деб қўшимча қилди у.
Гарш шаҳридаги касалхона шифокори Бенжамин Давидо, ўз навбатида, «янги чоралар касалхонага ётқизишлар сонининг пасайишига олиб келишини кўриш учун 14-21 кун вақт кетишини» таъкидлади. «Аммо муаммо шундаки, ҳозирда беморларимиз сони 2020 йил октябрь ойидаги иккинчи тўлқиннинг энг юқори чўққисида касалхонага ётқизилганлар сонидан ошиб кетган», —деди у.
Париждаги «Биша» касалхонасининг реанимация бўлими бошлиғи Жан-Франсуа Тимси ҳам мавжуд вазиятдан жиддий ташвишланмоқда. «Жойларнинг ҳаммаси лиқ тўлган... Янги беморларни қабул қилиш жуда мушкул масала», — деб таъкидлади у.
Ўтган дам олиш кунларидан бошлаб Франциянинг бир қатор ҳудудларида янги чеклов чоралари амал қилмоқда. Умуман олганда, чекловлар 16 та ҳудуддаги 21 миллион кишини қамраб олган.
Уларга қариндошлар билан алоқаларни чеклаш, шунингдек, масофадан туриб ишлаш режимига ўтиш тавсия қилинган. Очиқ жойда сайр қилиш ва харид қилиш учун уйдан 10 километрдан узоқ бўлмаган масофада ташқарига чиқишга рухсат берилади. Бир ҳудуддан бошқасига жиддий сабабсиз саёҳат қилиш тақиқланади.
Франция ҳукумати ушбу ҳудудлардаги мактаблар, болалар боғчалари ва бошқа таълим муассасаларининг фаолиятини чекламасликка қарор қилди. Янги чора-тадбирлар доирасида ҳаётий зарур аҳамиятга эга бўлмаган маҳсулотларни сотувчи дўконларнинг деярли барчаси ёпилди.
Париж ОАВнинг хабарига кўра, бундай «чекланган» блокировка Эммануэль Макроннинг янги қатъий чеклов чораларига қарши чиққанидан кейин жорий қилинган: Макроннинг фикрига кўра, аҳоли учун, айниқса, метрополитен минтақасида бундай шароитларга дош бериш қийин бўлган.
Аввалроқ Францияда коронавирусни аниқловчи тестлар сотила бошлаши ҳақида хабар берилганди. Хабарга кўра, аҳоли ушбу тестларни дорихона ва супермаркетлардан сотиб олиши мумкин.
Жонс Ҳопкинс университети маълумотларига кўра, пандемия бошидан бери Францияда 4 358 910 кишида коронавирус аниқланган, улардан 92 776 нафари касалликдан вафот этган.
Изоҳ (0)