Xiaomi kompaniyasi Poco F3 va X3 Pro’ni taqdim etdi: flagmanlar narxi 249 yevrodan boshlanadi

Xiaomi kompaniyasi bir biridan ancha farq qiluvchi ikki smartfonini — Poco F3 va X3 Pro flagmanlarini taqdim etdi, deb xabar beradi Hi-Tech.Mail.ru.

Poco F3 smartfoni hozirda Xitoyda muvaffaqiyatli sotilayotgan Redmi K40 modelini to‘liq takrorlaydi. Faqatgina yangi model Yevropa bozori uchun mo‘ljallangan. Poco F3 bilan birga Poco X3 Pro ham taqdim etilgan — bu esa mutlaqo yangi model hisoblanadi.

Poco F3 va X3 Pro taqqoslanganida chalkashlik yuzaga kelishi mumkin, chunki ushbu smartfonlar turli darajadagi modellar hisoblanadi. Poco F3 ishlash samaradorligi bo‘yicha o‘zidan oldingi avlod flagmanlari kabi — u Snapdragon 870 protsessorida ishlaydi. Poco X3 Pro’ga esa Snapdragon 860 o‘rnatilgan bo‘lib, u 2019-yilda taqdim etilgan Snapdragon 855+’ning yaxshilangan versiyasi hisoblanadi. Shuningdek, Poco F3’ga Poco X3 Pro’dagi LPDDR4X’dan ko‘ra tezroq LPDDR5 tezkor xotirasi o‘rnatilgan.

Smartfonlar tashqi ko‘rinishi bilan ham farqlanadi, konsepsiyasi standart — shisha qopqoq va metall rom. Ikkala holatda ham barmoq izi skaneri ekranda emas, qurilmaning yon tomonida joylashgan. Shuningdek, Poco X3 Pro’ning naushniklar uchun 3,5 millimetrli razyomi va microSD-karta uchun sloti mavjud, Poco F3’da esa yo‘q.

Displeylar ham texnik tavsiflariga o‘xshash, biroq ular orasida biroz farq mavjud. Umumiy jihati: Full HD+ sifatni qo‘llab-quvvatlovchi va 120 gertsli yangilanish chastotasiga ega 6,67 dyuymli ekran. Faqat Poco X3 Pro’ga IPS-matritsa o‘rnatilgan, sensor 240 gerts chastotali yangilanishga ega, usti esa Gorilla Glass 6 himoya oynasi bilan qoplangan. Oddiy Poco F3’da boshqacha jamlanma — AMOLED, 320 gertsli sensor, Gorilla Glass 5.

Ikkala smartfonning asosiy kameralari bir xil — 48 Mp, 1,6 mkm piksel va f/1,79 obyektiv. Poco X3 Pro’ga 8 megapikselli keng burchakli kamera, 2 megapikselli makro va chuqurlikni o‘lchovchi datchiklar qo‘shilgan. Poco F3’da ham 8 megapikselli keng burchakli kamera va 5 megapikselli makroobyektiv bor.

So‘nggi farq — akkumulyatorlari. Poco X3 Pro’ga sig‘imi 5160 mA/soatga teng batareya o‘rnatilgan bo‘lsa, Poco F3’da — 4520 mA/soat. Ikkala holatda ham qurilmalar 33 vattli tezkor quvvatlanish funksiyasiga ega.

Yevropada 6/128 gigabaytli Poco F3 modeli 349 yevro qiymatida sotuvga chiqqan bo‘lsa, Poco X3 Pro undan ham arzon — 6/128 gigabaytli versiyasi 249 yevro.

Avvalroq Redmi kompaniyasi K40 seriyasiga kiruvchi uchta smartfonini namoyish etgani to‘g‘risida xabar berilgandi.