Xiaomi компанияси Poco F3 ва X3 Pro’ни тақдим этди: флагманлар нархи 249 евродан бошланади

Xiaomi компанияси бир биридан анча фарқ қилувчи икки смартфонини — Poco F3 ва X3 Pro флагманларини тақдим этди, деб хабар беради Hi-Tech.Mail.ru.

Poco F3 смартфони ҳозирда Хитойда муваффақиятли сотилаётган Redmi K40 моделини тўлиқ такрорлайди. Фақатгина янги модель Европа бозори учун мўлжалланган. Poco F3 билан бирга Poco X3 Pro ҳам тақдим этилган — бу эса мутлақо янги модель ҳисобланади.

Poco F3 ва X3 Pro таққосланганида чалкашлик юзага келиши мумкин, чунки ушбу смартфонлар турли даражадаги моделлар ҳисобланади. Poco F3 ишлаш самарадорлиги бўйича ўзидан олдинги авлод флагманлари каби — у Snapdragon 870 процессорида ишлайди. Poco X3 Pro’га эса Snapdragon 860 ўрнатилган бўлиб, у 2019 йилда тақдим этилган Snapdragon 855+’нинг яхшиланган версияси ҳисобланади. Шунингдек, Poco F3’га Poco X3 Pro’даги LPDDR4X’дан кўра тезроқ LPDDR5 тезкор хотираси ўрнатилган.

Смартфонлар ташқи кўриниши билан ҳам фарқланади, концепцияси стандарт — шиша қопқоқ ва металл ром. Иккала ҳолатда ҳам бармоқ изи сканери экранда эмас, қурилманинг ён томонида жойлашган. Шунингдек, Poco X3 Pro’нинг наушниклар учун 3,5 миллиметрли разёми ва microSD-карта учун слоти мавжуд, Poco F3’да эса йўқ.

Дисплейлар ҳам техник тавсифларига ўхшаш, бироқ улар орасида бироз фарқ мавжуд. Умумий жиҳати: Full HD+ сифатни қўллаб-қувватловчи ва 120 герцли янгиланиш частотасига эга 6,67 дюймли экран. Фақат Poco X3 Pro’га IPS-матрица ўрнатилган, сенсор 240 герц частотали янгиланишга эга, усти эса Gorilla Glass 6 ҳимоя ойнаси билан қопланган. Оддий Poco F3’да бошқача жамланма — AMOLED, 320 герцли сенсор, Gorilla Glass 5.

Иккала смартфоннинг асосий камералари бир хил — 48 Мп, 1,6 мкм пиксел ва ф/1,79 объектив. Poco X3 Pro’га 8 мегапикселли кенг бурчакли камера, 2 мегапикселли макро ва чуқурликни ўлчовчи датчиклар қўшилган. Poco F3’да ҳам 8 мегапикселли кенг бурчакли камера ва 5 мегапикселли макрообъектив бор.

Сўнгги фарқ — аккумуляторлари. Poco X3 Pro’га сиғими 5160 мА/соатга тенг батарея ўрнатилган бўлса, Poco F3’да — 4520 мА/соат. Иккала ҳолатда ҳам қурилмалар 33 ваттли тезкор қувватланиш функциясига эга.

Европада 6/128 гигабайтли Poco F3 модели 349 евро қийматида сотувга чиққан бўлса, Poco X3 Pro ундан ҳам арзон — 6/128 гигабайтли версияси 249 евро.

Аввалроқ Redmi компанияси K40 сериясига кирувчи учта смартфонини намойиш этгани тўғрисида хабар берилганди.