Ўзбекистонда фирмаларга давлат тилида ном бериш хизмати ташкил этилади

«Савдо, ишлаб чиқариш ва хизмат кўрсатиш объектларига ном беришни такомиллаштириш чора-тадбирлари тўғрисида»ги ҳукумат қарори қабул қилинди.

Қарорга кўра, Тошкент давлат ўзбек тили ва адабиёти университети ҳузуридаги Давлат тилида иш юритиш асосларини ўқитиш ва малака ошириш маркази томонидан савдо, ишлаб чиқариш ва хизмат кўрсатиш объектларига давлат тилида ном бериш (нейминг) хизмати кўрсатилади.

Давлат хизматлари агентлиги бош юрисконсулти Камол Холиқовнинг таъкидлашича, тадбиркорлик субъектлари фаолият юритиши ва таъсис ҳужжатларида белгилаб олган мақсадларига эришиши учун фирма номини фаолият турларига мувофиқ тушунарли ва халқчил тилда танлаши муҳим аҳамият касб этади.

Бироқ аксарият ҳолларда Ўзбекистон фуқаролари таъсисчилигида ташкил этилган тадбиркорлик субъектлари — юридик шахслар бошқа тиллардан олинган сўзлар асосида фирма номини танлаб рўйхатдан ўтиш ҳолатлари кузатилмоқда. Хусусан, бугунги кунда Республика миқёсида group (таржимаси — гуруҳ) сўзи иштирок этган 8 553 та, grand (юқори) сўзи иштирок этган 3 766 та, golden (олтин) сўзи иштирок этган 1 997 та, sity (шаҳар) сўзи иштирок этган 1 696 та маҳаллий корхоналар фаолият юритиб келмоқда.

Камол Холиқовнинг қайд этишича, юқоридаги қарорнинг қабул қилиниши давлат тилидаги фирма номларини захирага олишда тадбиркорлик субъектлари учун кенг имконият яратиши билан бир қаторда маҳаллий корхоналарнинг фирма номларини давлат тилида юритилишини ҳам таъминлаш имконини беради.

Давлат тилида иш юритиш асосларини ўқитиш ва малака ошириш маркази қуйидаги вазифаларни амалга оширади:

• давлат тили қоида ва меъёрларига мувофиқ келадиган, миллий қадриятларга мос ҳамда объектларга қўйиш тавсия этиладиган номлар захирасини онлайн режимида шакллантириш ҳамда уни доимий янгилаб бориш;
• ташқи ёзув, пешлавҳа, реклама ва эълонлар матнини тайёрлаш, шунингдек, уларнинг давлат тили қоида ва меъёрларига мувофиқлиги, номларнинг бир хил ёки ўхшашлик даражаси юзасидан лингвистик экспертиза ўтказиш;
• объектлар учун давлат тилида номлар яратиш ва танлаш бўйича шартнома асосида хизматлар кўрсатиш.