Андижон шаҳрида яшовчи фуқаро қўшниси билан тортишиб қолиб, уни пичоқлаб ўлдирди. Бу ҳақда «Дарё» мухбири Умиджон Мамарасулов хабар берди.
Андижон вилоят суди судья катта ёрдамчиси Комроншоҳ Расуловнинг маълум қилишича, Андижон шаҳрининг «Мустақиллик» маҳалласида яшовчи Ориф Рустамов (исм-фамилиялар ўзгартирилган) 2020 йилнинг 3 октябрь куни аввалдан бирга ишлаб юрган қўшниси Нормурод Жалиловга қўнғироқ қилиб, ёлланма ишчи сифатида ишга чиқиш таклифини билдирган. Маст қўшниси эса бу таклифга жавобан «қорнинг оч қолдими? Агар оч қолган бўлсанг, онангни ҳам кўчага олиб чиқ» дея уни ҳақоратлаган.
Бундай муносабатни кутмаган Ориф телефонини ўчириб, ҳақорат сабабини билиш учун қўшнисининг уйига борган. Дастлаб қўшнисининг уйида йўқлигини эшитган Ориф бир неча соатдан сўнг яна қўшнисиникига қайтиб келган. Ва уни уйидан топиб, муштлашган. Уларнинг жанжалини кўрган қўшнилар тўполонга барҳам бериб, уларни тинчлантиришга уринган.
Бироқ жаҳли чиққан Ориф уйидаги хўжалик пичоғини олиб, қўшнисини излаб яна кўчага чиққан. Шу пайт кўчада Нормурод пайдо бўлган ва улар яна жанжаллашган. Ориф ёнидаги пичоқ билан қўшниси Нормуроднинг қорин қисмига жароҳат етказиб, уни ўлдириб қўйган. Шундан сўнг қамалишдан қўрқиб, «лезвия» билан ўз жонига қасд қилишга ҳам уринган.
Мазкур ишни кўриб чиққан суд Ориф Рустамовни Жиноят кодексининг 97-моддаси 2-қисми «ж» банди (қасддан одам ўлдириш) билан айбли деб топиб, уни 16 йил 6 ой муддатга озодликдан маҳрум қилган.
Изоҳ (0)