Kundalik kiyish uchun mo‘ljallangan eng mukammal libos, avvalo, universal bo‘lishi, qomatdagi kamchiliklarni yashirib, garderobdagi aksariyat aksessuarlarga mos bo‘lishi kerak. Ana shunda ko‘ngildagidek obraz yaratish va kishi o‘zini erkin his qilishi mumkin bo‘ladi.
Qora, kalta libos
Bunday ko‘ylak nafaqat qomatdagi kamchiliklarni yashirishi, balki afzalliklarga urg‘u berishi bilan ham o‘ziga xosdir. Bunday mukammal modeldagi libosni tanlash uchun qomat tuzilishi va bo‘y uzunligini ham inobatga olish kerak.
Masalan, Gvinet Peltrou singari A-siluetli libos istalgan qomat egasiga mos kelishi mumkin. Oyoqlari uzun va qiyshiq bo‘lmagan qizlar esa kalta variantlarga e’tibor qaratsa bo‘ladi. Sarvqomat ko‘rinishni istovchilarga esa belga kamar taqish tavsiya qilinadi. Bu borada Anjelina Jolining obrazidan ilhomlanish mumkin.
Trikotaj libos
Sovuq kunlar uchun trikotaj matodan tikilgan ko‘ylakdan yaxshisi yo‘q. Maksi uzunligidagi modellarni Viktoriya Bekxem singari ultrazamonaviy botfort, etiklar bilan kiysa bo‘ladi.
Kalta bichimli liboslarni xush ko‘ruvchilar esa Bella Xadid singari preppi uslubida kiyinishi mumkin.
Geometrik naqsh printi tushirilgan libos
70-yillardagidek grafik va geometrik shakllar printi tushirilgan liboslar eng universal modellar hisoblanadi. Gul va xol-xol printlardan farqli o‘laroq, mazkur ko‘ylaklar bilan rang-barang obraz yaratsa bo‘ladi. Ular nafaqat kundalik, balki ish uchun ham ayni muddao. Riz Uizerspun va Kristen Danstning obrazi sizga bu borada shpargalka bo‘la oladi.
Izoh (0)