Samarqandlik erkak arazlab opasinikiga ketib qolgan ayolini pichoqlab o‘ldirdi, deya xabar bermoqda “Zamon” informatsion dasturi.
Ma’lum qilinishicha, er-xotin o‘rtasidagi janjalga rashk sabab bo‘lgan. Marhumaning akasi aytishicha, uning singlisi erining zo‘ravonligidan aziyat chekayotganini aytgan. Ayol ushbu masalada bir necha marta mutasaddilardan ham ko‘mak so‘ragan.
“22-oktabr kuni eri tomonidan kaltaklanganidan keyin opasining uyiga qochib kelgan. Eri uning orqasidan kelgan”, — deydi ayolning akasi.
Sudlanuvchi o‘zi tomonidan sodir etilgan o‘ta og‘ir jinoyat fosh bo‘lishini o‘ylab, muqarrar javobgarlikdan qutulish maqsadida qo‘lidagi oshxona pichog‘i bilan o‘z joniga suiqasd qilgan. Biroq hodisa joyiga kelib qolgan guvohlarning yordami bilan hayoti saqlab qolingan.
“2019-yil 25-aprel kuni turmush qurgandik. Rashk tufayli kelishmovchilik chiqqan. Qilgan xatomni angladim”, — deydi ayblanuvchi.
Sudda aytilgan ko‘rsatmalarga ko‘ra, 33 yoshli ayol 39 yoshli sudlanuvchining 3-turmush o‘rtog‘i hisoblangan. Erkak birinchi xotinidan farzand ko‘rmagani uchun, ikkinchi xotinidan ayol Turkiyaga ketib qolgani uchun ajrashgan.
Mazkur holat yuzasidan ayblanuvchi Toyloq tuman sudi tomonidan Jinoyat kodeksining 97-moddasi 2-qismi “j” bandida nazarda tutilgan jinoyatda aybli deb topilib, 17 yilga ozodlikdan mahrum qilindi.
Bundan avval Samarqandda 7 va 14 yoshli aka-ukalar 27 yoshli qo‘shni ayol tomonidan o‘ldirilgani, bolg‘a bilan ota-bolani o‘ldirib, ularning uyini talon-toroj qilgan erkak 22 yilga qamalgani hamda Samarqandda to‘rt yigit ularning ayol qarindoshiga birga bo‘lishni taklif qilgan erkakni o‘ldirib, jasadini kanalga oqizib yuborgani haqida xabar berilgandi.
