Тошкент вилоятида ЙПХ ходимига 5 миллион сўм пора таклиф қилган ҳайдовчи қўлга олинди, дея «Дарё»га хабар бермоқда вилоят ЙҲХБ.
Қайд этилишича, 2021 йилнинг 15 март куни Ўзбекистон ИИВ Ўз хавфсизлик бошқармасининг Тошкент вилояти бўйича бўлимига Тошкент вилояти ИИББ Йўл ҳаракати хавфсизлиги бошқармаси, ЙПХБ ЙПХ махсус отряди, 1-сафарбар гуруҳ командири, капитан Д.I. билдирги билан мурожаат қилади.
Ўз мурожаатида у 15 март куни ЙПХ инспектори, сафдор А.Р. ҳайдовчи Б.Ш. бошқарувидаги Lacetti ’ни текшириш учун тўхтатганини, ҳайдовчи маст ҳолда экани аниқланганини ва унга нисбатан тегишли тартибда маъмурий баённома расмийлаштирилиб, автомашина жарима майдонига қўйилганини билдиради.
Мазкур ҳолат юзасидан ҳайдовчи Б.Ш. унинг ёнига келиб, содир этган қоидабузарлигини енгилроқ қоидабузарлик турига алмаштириб, автомашинасини жарима майдончасидан чиқариб беришини, бунинг эвазига 5 миллион сўм миқдоридаги пулни пора сифатида таклиф қилаётганини, ушбу фуқарога пора бериш жиноят эканини тушунтиришига қармай, унга тўхтовсиз пора таклиф қилаётганини билдириб, ҳайдовчига нисбатан тегишли тартибда чора кўришни сўрайди.
ЙПХ ходимининг билдиргиси асосида, ИИВ ЎХБ Тошкент вилояти бўйича бўлими ва Чирчиқ шаҳар прокуратураси ходимлари билан ҳамкорликда тезкор тадбир ўтказилиб, жарима майдонининг қоровулхонасида гумон қилинган шахс ЙПХ ходимига 5 миллион сўм пулларни пора тариқасида бераётган вақтида қўлга олинган.
Мазкур ҳолат юзасидан фуқаро Б.Ш.га нисбатан Жиноят кодексининг 211-моддаси 1-қисми (пора бериш) билан жиноят иши қўзғатилган.
Самарқандда фуқарони «аёллар дафтари»га киритиш учун 500 доллар талаб қилган маҳалла раисига жиноят иши қўзғатилгани, Самарқандда ИИБ терговчилари бошлиғига 1000 доллар пора таклиф қилган фуқаро қўлга олингани ҳамда Фарғонада ноқонуний никоҳ ўқиганига чора кўрмаслик учун профилактика инспекторига 2 миллион сўм пора таклиф қилган шахс ушлангани ҳақида хабар берилганди.
Изоҳ (0)