Apple’dan yangi “gadjet”: kompaniya virtual reallikda yordam beradigan paypoq tayyorlamoqda

Apple kompaniyasi virtual reallik garniturasini boshqarishga yordam beradigan yangi qurilmani patentladi, deb xabar beradi Hi-Tech.Mail.ru.

Patent izohida qayd etilishicha, kiyim elementiga oyoqlar harakatini hisobga oladigan va uni virtual reallikda tasvirlangan qo‘shimcha “vstavka”lar o‘rnatiladi. Bundan tashqari, texnologiya foydalanuvchiga raqamli makondagi obyektlarga teginishdagi hissiyotni taqdim etish imkonini beradi. Buning uchun, masalan, vibratsiyadan foydalanish mumkin.

Bu turdagi “gadjet”lardan nafaqat VR-garniturani boshqarishda foydalanish mumkin, balki paypoqlar foydalanuvchining kompyuter, smartfon yoki “aqlli” ko‘zoynaklar bilan aloqasini yaxshilashga ham qodir.

Hozircha paypoqlar faqat qog‘ozda bor. U haqiqatan ham taqdim etilishi hozircha noma’lum — barchasi kompaniyaning kelajakdagi harakatlariga bog‘liq.

Avvalroq Apple virtual reallik garniturasini boshqarishga xizmat qiladigan barmoqlarga taqiluvchi o‘zining yangi qurilmasini namoyish etgandi.