O‘zbekiston Prezidenti huzuridagi tadbirkorlik subyektlarining huquqlari va qonuniy manfaatlarini himoya qilish bo‘yicha vakillik — biznes-ombudsman Qashqadaryo viloyat soliq boshqarmasining noqonuniy xatti-harakatini fosh qilib, qo‘shma korxonadan undirilgan salkam 41 milliard so‘mlik soliq to‘lovlarini qaytardi. Bu haqda “Daryo”ga Biznes-ombudsman devonining Qashqadaryo viloyatidagi vakili Sheroz Shodiyev ma’lum qildi.
Aytilishicha, Qashqadaryo viloyatida faoliyat yurituvchi MChJ shaklidagi “Gissarneftegaz” qo‘shma korxonasi O‘zbekiston Prezidenti huzuridagi tadbirkorlik subyektlarining huquqlari va qonuniy manfaatlarini himoya qilish bo‘yicha vakillikka murojaat qilib, soliq idorasi xodimlarining xatti-harakatidan noroziligini bildirgan.
O‘rganishlar natijasidan ma’lum bo‘lishicha, qo‘shma korxonada Qashqadaryo viloyat davlat soliq boshqarmasi boshlig‘ining 2019-yil 17-iyundagi buyrug‘iga asosan ekspress o‘rganish o‘tkazilgan.
O‘tkazilgan o‘rganish natijalariga ko‘ra, MChJ tomonidan ko‘char mulk sifatida balansda qayd qilingan qiymati 574 milliard 197 million 298 ming 567 so‘m bo‘lgan 329 ta asosiy vosita soliq idorasi tomonidan ko‘chmas mulk sifatida baholanib, ular uchun jami 40 milliard 465 million 272 ming so‘m mol-mulk solig‘i hisoblangan.
Biznes-ombudsman vaziyatga aniqlik kiritish maqsadida davlat kadastrlari, geodeziya va kartografiya milliy markaziga so‘rov yuborgan va markazning 2019-yil 15-oktabrda bergan xulosasida soliq organlari tomonidan ko‘chmas mulk sifatida baholangan 329 ta ashyodan faqatgina 9 tasi ko‘chmas mulk sifatida e’tirof qilingani oydinlashgan.
G‘uzor tuman iqtisodiy sudi yuqoridagi xulosani inobatga olib, qo‘shma korxonadan 165 million 766 ming 760 so‘m mol-mulk solig‘ini undirish bo‘yicha qaror qilgan. Lekin Qashqadaryo viloyat kassatsiya instansiyasining 2020-yil 18-iyundagi qarori bilan birinchi instansiya sudining hal qiluv qarori o‘zgartirilib, qo‘shma korxonadan 40 milliard 465 million 272 ming so‘m mol-mulk solig‘i undirilgan.
Biznes-ombudsman ushbu holat yuzasidan zarur dalil va hujjatlarga tayangan holda qo‘shma korxona manfaatini himoya qilib Oliy sudga Qashqadaryo viloyat iqtisodiy sudi kassatsiya instansiyasining qarori yuzasida shikoyat kiritgan va Oliy sudning 2021-yil 26-fevraldagi qarori bilan qo‘shma korxona manfaatiga zid tarzda chiqarilgan Qashqadaryo viloyat iqtisodiy sudi kassatsiya instansiyasining qarori bekor qilingan. Qo‘shma korxonadan esa, 40 milliard 465 million so‘m emas 165 million 766 ming so‘m soliq undirilgan.
Izoh (0)