Ўзбекистон Президенти ҳузуридаги тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакиллик — бизнес-омбудсман Қашқадарё вилоят солиқ бошқармасининг ноқонуний хатти-ҳаракатини фош қилиб, қўшма корхонадан ундирилган салкам 41 миллиард сўмлик солиқ тўловларини қайтарди. Бу ҳақда «Дарё»га Бизнес-омбудсман девонининг Қашқадарё вилоятидаги вакили Шероз Шодиев маълум қилди.
Айтилишича, Қашқадарё вилоятида фаолият юритувчи МЧЖ шаклидаги «Гиссарнефтегаз» қўшма корхонаси Ўзбекистон Президенти ҳузуридаги тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакилликка мурожаат қилиб, солиқ идораси ходимларининг хатти-ҳаракатидан норозилигини билдирган.
Ўрганишлар натижасидан маълум бўлишича, қўшма корхонада Қашқадарё вилоят давлат солиқ бошқармаси бошлиғининг 2019 йил 17 июндаги буйруғига асосан экспресс ўрганиш ўтказилган.
Ўтказилган ўрганиш натижаларига кўра, МЧЖ томонидан кўчар мулк сифатида балансда қайд қилинган қиймати 574 миллиард 197 миллион 298 минг 567 сўм бўлган 329 та асосий восита солиқ идораси томонидан кўчмас мулк сифатида баҳоланиб, улар учун жами 40 миллиард 465 миллион 272 минг сўм мол-мулк солиғи ҳисобланган.
Бизнес-омбудсман вазиятга аниқлик киритиш мақсадида давлат кадастрлари, геодезия ва картография миллий марказига сўров юборган ва марказнинг 2019 йил 15 октябрда берган хулосасида солиқ органлари томонидан кўчмас мулк сифатида баҳоланган 329 та ашёдан фақатгина 9 таси кўчмас мулк сифатида эътироф қилингани ойдинлашган.
Ғузор туман иқтисодий суди юқоридаги хулосани инобатга олиб, қўшма корхонадан 165 миллион 766 минг 760 сўм мол-мулк солиғини ундириш бўйича қарор қилган. Лекин Қашқадарё вилоят кассация инстанциясининг 2020 йил 18 июндаги қарори билан биринчи инстанция судининг ҳал қилув қарори ўзгартирилиб, қўшма корхонадан 40 миллиард 465 миллион 272 минг сўм мол-мулк солиғи ундирилган.
Бизнес-омбудсман ушбу ҳолат юзасидан зарур далил ва ҳужжатларга таянган ҳолда қўшма корхона манфаатини ҳимоя қилиб Олий судга Қашқадарё вилоят иқтисодий суди кассация инстанциясининг қарори юзасида шикоят киритган ва Олий суднинг 2021 йил 26 февралдаги қарори билан қўшма корхона манфаатига зид тарзда чиқарилган Қашқадарё вилоят иқтисодий суди кассация инстанциясининг қарори бекор қилинган. Қўшма корхонадан эса, 40 миллиард 465 миллион сўм эмас 165 миллион 766 минг сўм солиқ ундирилган.
Изоҳ (0)