“Turon” bosh murabbiyi Islom Ismoilov “So‘g‘diyona”ga qarshi uchrashuvdan keyingi keskin fikrlari sabab 2 o‘yinga diskvalifikatsiya qilindi

O‘zbekiston futbol assotsiatsiyasi tartib-intizom qo‘mitasining navbatdagi yig‘ilishidan keyin bir qator shaxslarga intizomiy choralar qo‘llandi.

Xususan, “So‘g‘diyona” — “Turon” uchrashuvidan (1:0) keyin o‘z fikrlarini keskin ohangda bildirgan yaypanliklar bosh murabbiy Islom Ismoilov ikkita o‘yinga diskvalifikatsiya qilindi. Shuningdek, mazkur o‘yindan keyingi fikrlari uchun “Turon” prezidentiga ham jarima solindi.

“Turon” futbol klubi bosh murabbiyi Jizzaxdagi o‘yindan so‘ng “portladi”. U “o‘yin bermayotgan hakamlar”ga chora ko‘rishni talab qildi

Quyida O‘FA tartib-intizom qo‘mitasi qarorlari bilan tanishing:

• O‘zbekiston Superligasi 2-turi doirasida “Turon” klubi murabbiyi Islombek Ismoilov “So‘g‘diyona” klubiga qarshi bahsdan keyingi rasmiy flesh-intervyu chog‘ida so‘kingan holda, etika normalarini buzganligi uchun tartib-intizom qo‘mitasi unga nisbatan 2 ta o‘yinga chetlashtirish intizomiy chorasini belgiladi. “Turon” klubi prezidenti Abduvahob Ahmadaliyev “So‘g‘diyona” klubiga qarshi bahsdan keyingi flesh-intervyu chog‘ida o‘z fikrlarini qo‘pol tarzda bildirgani uchun tartib-intizom qo‘mitasi unga nisbatan jarima intizomiy chorasini belgiladi.
• O‘zbekiston Futzal Oliy ligasining 13-turi doirasidagi “Navbahor lochinlari” — OKMK uchrashuvida OKMK futbolchisi Ilhomjon Hamroyev raqibiga zarba berishga uringanligi va tajovuzkor xatti-harakatlarni amalga oshirganligi uchun unga nisbatan 2 ta o‘yinga chetlashtirish hamda jarima intizom chorasi belgilandi.
• O‘zbekiston Superligasi 1-turi doirasidagi “Bunyodkor” — “Mash’al” uchrashuvida muborakliklar futbolchisi Muhammad Yo‘ldoshev uchrashuvda oyoq kiyimining tag qismi bilan raqib jamoasi futbolchining ko‘krak qismiga tepgani uchun 2 ta o‘yinga chetlashtirildi.
• O‘zbekiston U-21 birinchiligi 1-turi doirasidagi “Navbahor lochinlari U-21” — “So‘g‘diyona U-21” uchrashuvida “Navbahor lochinlari U-21” futbolchisi Islomjon Abdullaxonov va “So‘g‘diyona U-21” futbolchisi Nodirbek Qutiboyev o‘yin rasmiylariga haqoratli so‘zlar ishlatgani uchun ularga nisbatan 3 ta o‘yinga chetlashtirish intizom chorasi ko‘rildi. Shuningdek, mazkur bahsda “So‘g‘diyona U-21” bosh murabbiyi Rasul Xayitov o‘zini nazorat qila olmay, maydonga tushib, raqib jamoasi va o‘z jamoasi sha’niga haqoratli so‘zlar ishlatgani uchun unga nisbatan 2 ta o‘yinga chetlashtirish hamda jarima intizom chorasi belgilandi.