Professional boksning super yarim o‘rta (-69,85 kg) vazn toifasida harakat qilayotgan Isroil Madrimov (6-0, 5 KO) 3-aprel kuni Toshkentdagi Humo Arena’da tashkil etiladigan boks kechasida ringga ko‘tariladi.
Isroilga bu jangda kongolik Emmani Kalombo (14-0, 14 KO) raqiblik qiladigan bo‘ldi. E’tiborlisi, Kalombo o‘z ishtirokidagi 14 jangning barchasida nokaut evaziga g‘alaba qozongan. U oxirgi jangini 2019-yilning 16-dekabrida Daniel Lartiniga qarshi o‘tkazgan.
Avvalroq Shahram G‘iyosov Toshkentdagi boks oqshomida Isa Chaniyevga, Iqboljon Xoldorov Volodimir Gordiyenkoga, Hasanboy Do‘stmatov esa Aleksis Diasga qarshi jang qilishi xabar qilingandi.
Shuningdek, mazkur boks oqshomida Bahodir Jalolov, Elnur Abduraimov, Sanjar Tursunov kabi o‘zbekistonlik bokschilar jang qilishi kutilmoqda. Shu kechada Mirazizbek Mirzahalilov ham prof boksdagi debyutini o‘tkazadi.
Eslatib o‘tamiz, Madrimov 2020-yilning 16-avgust sanasida amerikalik Erik Uokerga (20-3, 9 KO) qarshi jangdagi g‘alabasi orqali WBA Jahon chempionlik kamari uchun majburiy da’vogarga aylangandi.
Izoh (0)