«Турон» бош мураббийи Ислом Исмоилов «Сўғдиёна»га қарши учрашувдан кейинги кескин фикрлари сабаб 2 ўйинга дисквалификация қилинди

Ўзбекистон футбол ассоциацияси тартиб-интизом қўмитасининг навбатдаги йиғилишидан кейин бир қатор шахсларга интизомий чоралар қўлланди.

Хусусан, «Сўғдиёна» — «Турон» учрашувидан (1:0) кейин ўз фикрларини кескин оҳангда билдирган яйпанликлар бош мураббий Ислом Исмоилов иккита ўйинга дисквалификация қилинди. Шунингдек, мазкур ўйиндан кейинги фикрлари учун «Турон» президентига ҳам жарима солинди.

«Турон» футбол клуби бош мураббийи Жиззахдаги ўйиндан сўнг «портлади». У «ўйин бермаётган ҳакамлар»га чора кўришни талаб қилди

Қуйида ЎФА тартиб-интизом қўмитаси қарорлари билан танишинг:

• Ўзбекистон Суперлигаси 2-тури доирасида «Турон» клуби мураббийи Исломбек Исмоилов «Сўғдиёна» клубига қарши баҳсдан кейинги расмий флеш-интервью чоғида сўкинган ҳолда, этика нормаларини бузганлиги учун тартиб-интизом қўмитаси унга нисбатан 2 та ўйинга четлаштириш интизомий чорасини белгилади. «Турон» клуби президенти Абдуваҳоб Аҳмадалиев «Сўғдиёна» клубига қарши баҳсдан кейинги флеш-интервью чоғида ўз фикрларини қўпол тарзда билдиргани учун тартиб-интизом қўмитаси унга нисбатан жарима интизомий чорасини белгилади.
• Ўзбекистон Футзал Олий лигасининг 13-тури доирасидаги «Навбаҳор лочинлари» — ОКМК учрашувида ОКМК футболчиси Илҳомжон Ҳамроев рақибига зарба беришга уринганлиги ва тажовузкор хатти-ҳаракатларни амалга оширганлиги учун унга нисбатан 2 та ўйинга четлаштириш ҳамда жарима интизом чораси белгиланди.
• Ўзбекистон Суперлигаси 1-тури доирасидаги «Бунёдкор» — «Машъал» учрашувида муборакликлар футболчиси Муҳаммад Йўлдошев учрашувда оёқ кийимининг таг қисми билан рақиб жамоаси футболчининг кўкрак қисмига тепгани учун 2 та ўйинга четлаштирилди.
• Ўзбекистон U-21 биринчилиги 1-тури доирасидаги «Навбаҳор лочинлари U-21» — «Сўғдиёна U-21» учрашувида «Навбаҳор лочинлари U-21» футболчиси Исломжон Абдуллахонов ва «Сўғдиёна U-21» футболчиси Нодирбек Қутибоев ўйин расмийларига ҳақоратли сўзлар ишлатгани учун уларга нисбатан 3 та ўйинга четлаштириш интизом чораси кўрилди. Шунингдек, мазкур баҳсда «Сўғдиёна U-21» бош мураббийи Расул Хайитов ўзини назорат қила олмай, майдонга тушиб, рақиб жамоаси ва ўз жамоаси шаънига ҳақоратли сўзлар ишлатгани учун унга нисбатан 2 та ўйинга четлаштириш ҳамда жарима интизом чораси белгиланди.