Yaponiyada tibbiyot xodimlari Filippindan kelgan erkakda koronavirusning yangi shtammini aniqladi. Bu haqda Kyodo News xabar berdi.
Mamlakat Sog‘liqni saqlash, mehnat va farovonlik vazirligining xabar berishicha, 60 yoshli erkak Filippindan 25-fevral kuni Tokio yaqinidagi Narita xalqaro aeroportiga kelgan. Undagi kasallik simptomlarsiz kechgan.
Uning aeroportdagi karantin vaqtida COVID-19’ga topshirgan testining natijasi ijobiy chiqqan.
Bu “britancha”, “braziliyacha” va “afrikacha” shtammlaridan farq qiluvchi koronavirusning mamlakatda aniqlangan birinchi holati hisoblanadi.
Avvalroq Yaponiyada koronavirusning “britancha” shtammi yangi o‘chog‘i aniqlangani, bemorlar Saytama va Tokioda qayd etilib, ular 40 yoshdan 60 yoshgacha bo‘lgan erkak va ayollardan iborat bo‘lgani haqida xabar berilgan edi.
Ma’lumot uchun, Buyuk Britaniyada VUI deb nom berilgan koronavirusning yangi shtammi bilan bog‘liq to‘rtta holat aniqlandi va umumiy holatlar soni o‘ntaga yetdi, shulardan yettitasi Angliyada, uchtasi Shotlandiyada qayd etilgan. Ilk ikkita holat Buyuk Britaniyada 4-mart kuni yaqinda Antiguada bo‘lib qaytgan shaxslarda kuzatilgan edi.
Mavzuga doir:
Izoh (0)