Тошкентда ҳайдовчилик гувоҳномасини олиш учун ўқишга кирган фуқаронинг дарсларга қатнашмаслиги ва тиббий дафтарни тайёрлаб бериш эвазига ундан 1,5 миллион сўм талаб қилган Миробод ўқув спорт-техника клуби директори қўлга олинди, деб хабар беради пойтахт ИИББ.
Ўтказилган тезкор тадбирда 1988 йилда туғилган директор талаб қилинган пулдан 100 АҚШ доллари ва 300 минг сўм олган вақтида ушланган.
Шунингдек, Юнусобод туманида «Ватанпарвар» ДУКнинг ўқув спорт-техника клуби директори ўқишга кирган фуқародан «Б» тоифадаги ўқув курсига қабул қилиниши учун жами 6 миллион сўм талаб қилган. Директор шундан 600 минг сўми тиббий дафтарни расмийлаштиришга, 4 миллион сўми касса тўловига, қолган 1,4 миллион сўми дарсларда қатнашмаслик учунлигини айтган.У талаб қилинган пулдан 300 АҚШ долларини олган вақтида далилий ашёлар билан қўлга тушган.
Мазкур ҳолатлар бўйича Жиноят кодексининг тегишли моддалари билан жиноят иши қўзғатилган ва дастлабки тергов ҳаракатлари олиб борилмоқда.
Аввалроқ Сирдарёда Давлат солиқ бошқармаси бўлим бошлиғи 1000 доллар пора билан қўлга тушгани, Жиззахда дарахтларнинг кесилганини яшириш учун пора талаб қилган атроф-муҳитни муҳофаза қилиш ходими ушлангани ҳамда Қўқон давлат педагогика институтига ўқишга киритиб қўйишни ваъда қилиб, 3 минг доллар олган деканга суд ҳукми ўқилгани ҳақида хабар берилганди.
Изоҳ (0)