Daniyaning Lego A/S o‘yinchoq ishlab chiqaruvchi kompaniyasi 2020-yil natijalariga ko‘ra, pandemiya sharoitida turli yoshdagi xaridorlar orasida kompaniya mahsulotlariga talab yuqori bo‘lganligi sababli rekord darajada daromad topdi. Bu haqda “Interfaks” xabar berdi.
Kompaniyaning press-relizida xabar berilishicha, kompaniyaning sof foydasi 19 foizga, ya’ni 9,92 milliard Daniya kroniga (taxminan, 1,6 milliard dollar) ko‘tarilgan. 2019-yilda bu ko‘rsatkich 8,31 milliard kronni tashkil qilgan edi. Operatsion foyda ham 10,84 milliard krondan 12,91 milliard kronga ko‘tarilib, 19 foizni tashkil qilgan.
Yillik foyda 38,544 milliard krondan 43,656 milliard kronga oshib, 13 foizni tashkil qilgan. Bloomberg nashrining yozishicha, bu kompaniyaning bir yil davomida erishgan eng yuqori ko‘rsatkichi hisoblanadi.
Lego kompaniyasi bosh direktori Nils Kristiansen boshchiligida plastik konstruktorlarni raqamli texnologiyalar bilan bog‘laydigan onlayn platformalar va mahsulotlarni ishlab chiqarishga katta mablag‘ sarflanmoqda. Shuningdek, kompaniya jahon bozoridagi ishtirokini kengaytiryapti.
2020-yilda 134 ta mamlakatda kompaniyaning rasmiy do‘konlari ochildi, shulardan 91 tasi Xitoyda faoliyat yuritmoqda. 2021-yilda yana 120 ta do‘kon ochish rejalashtirilgan, ularning 80 tasi Xitoyda ochiladi.
“So‘nggi ikki yil ichida biz uzoq muddatli o‘sishni qo‘llab-quvvatlashga qaratilgan tashabbuslarga katta sarmoya kiritdik. 2020-yilda biz elektron tijorat va mahsulot innovatsiyasida buning foydasini ko‘rishni boshladik”, — dedi Kristiansen.
Uning Financial Times gazetasiga xabar berishicha, Lego kompaniya va uning mahsulotlarini raqamlashtirishni davom ettirish uchun raqamli loyihalarga yuzlab yangi xodimlarni yollaydi. 2020-yil yakunlariga ko‘ra, kompaniyada 20 468 nafar xodim ishlaydi. Bu ko‘rsatkich 2019-yilda 18 800 kishini tashkil qilgan.
Avvalroq Ilon Maskning boyligi bir kun ichida rekord darajada — 25 mlrd dollarga ko‘paygani haqida xabar berilgan edi.
Izoh (0)