“Daryo” muxbiri Musulmonbek Ibrohimov 2020-yilning mart oyida Respublika teri-tanosil kasalliklari shifoxonasida o‘rnatilgan noodatiy tartib yuzasidan bosh shifokor qabulida bo‘ladi. Qabulxonada bosh shifokor holat yuzasidan izoh berar chog‘i muxbirni haqoratlab, ma’lumot olishda to‘sqinlik qiladi. Shundan so‘ng muxbir ichki ishlar organiga qo‘ng‘iroq qilib, ariza qoldiradi.
Ish qonunlarda yozilganidek oson kechmaydi. Odatda ko‘pi bilan 10 ish kunida hal bo‘ladigan ma’muriy ish 8 oyga cho‘zilib ketadi. Bu o‘rtada muxbir bexabar sud ham bo‘lib o‘tadi. Musulmonbek Ibrohimovning Toshkent shahar prokuraturasiga yozgan arizasidan so‘ng ish qayta ko‘rilib, yana sudga oshiriladi.
Mavzuga doir: Jurnalistning sakkiz oylik sargardonligi: Huquq posbonlari aybdor bosh shifokorni jarimaga tortolmayapti
Mirobod tuman IIB qo‘shimcha surishtiruv ishlarini yakunlab, ishni sudga taqdim etgan. Jinoyat ishlari bo‘yicha Mirobod tuman sudi 2021-yilning 4-fevral kuni bo‘lib o‘tgan ochiq sud majlisida M.G‘iyosov raisligida bosh shifokor Oybek Ibrohimovga nisbatan Ma’muriy javobgarlik to‘g‘risidagi kodeksning 183-moddasi bilan yuritilgan ishni ko‘rib chiqqan.
Sud ish hujjatlarini tekshirib Oybek Ibrohimovning huquqbuzarlikni sodir etganlikdagi aybi uning sudda bergan ko‘rsatuvidan tashqari, ish hujjatidagi tushuntirish xatlari, ish bo‘yicha tuzilgan bildirgi, bayonnoma va ishdagi boshqa hujjatlar bilan o‘z tasdig‘ini topganini bildirgan. Shuningdek, sud huquqbuzarning harakatlari Ma’muriy javobgarlik to‘g‘risidagi kodeksning 183-moddasi (mayda bezorilik) bilan to‘g‘ri kvalifikatsiya qilingan deb hisoblagan (ushbu modda bo‘yicha aybli deb topilganlar bazaviy hisoblash miqdorining uch baravaridan besh baravarigacha miqdorda jarima solishga yoki 15 sutkagacha muddatga ma’muriy qamoqqa olishga sabab bo‘ladi).
Sud huquqbuzar Oybek Ibrohimovga jazo turi va miqdorini tayinlashda javobgarlikni yengillashtiruvchi va og‘irlashtiruvchi holatlarni — u tomonidan sodir etilgan qilmishning ijtimoiy xavflilik xususiyati va darajasini, shaxsini, oilaviy ahvolini, qilmishidan pushaymonligini inobatga olib, unga nisbatan modda sanksiyasida nazarda tutilgan jarima jazosini tayinlashni lozim topgan. Sud qaroriga ko‘ra, Oybek Ibrohimov Ma’muriy javobgarlik to‘g‘risidagi kodeksning 183-moddasida nazarda tutilgan huquqbuzarlikni sodir etgan deb topilgan. Unga nisbatan bazaviy hisoblash miqdorining uch baravari miqdorida — 669 ming so‘m jarima solingan. Jarimani davlat foydasiga undirish belgilab qo‘yilgan.
Ma’lumot o‘rnida: Sud majlisi ochiq o‘tkazilgan bo‘lsa-da, sudya ishni audio shaklida yozib olishga ruxsat bermay, Oliy sud plenumining “Sud muhokamasi oshkoraligini va sudlar faoliyatiga doir axborot olish huquqini ta’minlash to‘g‘risida”gi qarorining 14-bandiga zid ravishda ish ko‘rgan. Ya’ni, sud majlisida raislik qiluvchi ochiq sud majlisida audioyozuvni amalga oshirishga taraflar roziligini olmasdan, rad javobini bergan, ayni vaqtda muxbirning iltimosnomasini rad etish haqida ajrim chiqarib bermagan.
Xulosa o‘rnida
“Daryo” muxbiri Musulmonbek Ibrohimovning ta’kidlashicha, OAV e’tibor qaratgan dolzarb mavzular bo‘yicha tezkor munosabat bildirishi va ijtimoiy tarmoqdagi kayfiyatni ko‘taruvchi izohlaridan Toshkent shahar IIBB va uning hududiy tuzilmalari zo‘r ishlayotgandek taassurot uyg‘onsa-da, “o‘tgan bir yil davomida kuzatganlari davomida, afsuski, bu ‘yaltiroq islohotlar’ning ortidagi ishlar hali ko‘ngildagidek emasligiga o‘zi, o‘z tanida guvohi bo‘lgan”.“Respublikada sanoqli hisoblangan tibbiyot muassasalaridan birining rahbari sodir etgan nomaqbul xatti-harakat ustidan shikoyat qilib, orada o‘zim aybdorga aylanay deganim mayli, shugina ma’muriy ish bir yilga cho‘zilganidan achchiqlanaman — vaqti kelsa ‘beayb aybdor’lar taqdirini 15 daqiqaga qolmay hal qila oladigan tizim nega bunga kelganda ‘tormozlanadi’? Men-ku jurnalist, o‘rnimda jurnalist bo‘lmagan, huquq ko‘chasidan uzoq, bilib-bilmay ortiqcha savol berib qo‘ygan boshqa hamyurtimiz, nima, kaltak yeb yo haqorat eshitib ketaverishi kerakmi? Bosh shifokori o‘zini eplay olmay, qo‘l ko‘tarsa, ichki ishlar xodimi kaltak yegan murojaatchini ‘terpila’ga chiqarsa, sudyasi zalda boshqa qarorni o‘qib, imi-jimida mushtumzo‘rga qulay boshqa qarorga qo‘l qo‘ysa, dodingni kimga aytasan?”, — deydi u.
Izoh (0)