«Дарё» мухбири Мусулмонбек Иброҳимов 2020 йилнинг март ойида Республика тери-таносил касалликлари шифохонасида ўрнатилган ноодатий тартиб юзасидан бош шифокор қабулида бўлади. Қабулхонада бош шифокор ҳолат юзасидан изоҳ берар чоғи мухбирни ҳақоратлаб, маълумот олишда тўсқинлик қилади. Шундан сўнг мухбир ички ишлар органига қўнғироқ қилиб, ариза қолдиради.
Иш қонунларда ёзилганидек осон кечмайди. Одатда кўпи билан 10 иш кунида ҳал бўладиган маъмурий иш 8 ойга чўзилиб кетади. Бу ўртада мухбир бехабар суд ҳам бўлиб ўтади. Мусулмонбек Иброҳимовнинг Тошкент шаҳар прокуратурасига ёзган аризасидан сўнг иш қайта кўрилиб, яна судга оширилади.
Мавзуга доир: Журналистнинг саккиз ойлик саргардонлиги: Ҳуқуқ посбонлари айбдор бош шифокорни жаримага тортолмаяпти
Миробод туман ИИБ қўшимча суриштирув ишларини якунлаб, ишни судга тақдим этган. Жиноят ишлари бўйича Миробод туман суди 2021 йилнинг 4 февраль куни бўлиб ўтган очиқ суд мажлисида М.Ғиёсов раислигида бош шифокор Ойбек Иброҳимовга нисбатан Маъмурий жавобгарлик тўғрисидаги кодекснинг 183-моддаси билан юритилган ишни кўриб чиққан.
Суд иш ҳужжатларини текшириб Ойбек Иброҳимовнинг ҳуқуқбузарликни содир этганликдаги айби унинг судда берган кўрсатувидан ташқари, иш ҳужжатидаги тушунтириш хатлари, иш бўйича тузилган билдирги, баённома ва ишдаги бошқа ҳужжатлар билан ўз тасдиғини топганини билдирган. Шунингдек, суд ҳуқуқбузарнинг ҳаракатлари Маъмурий жавобгарлик тўғрисидаги кодекснинг 183-моддаси (майда безорилик) билан тўғри квалификация қилинган деб ҳисоблаган (ушбу модда бўйича айбли деб топилганлар базавий ҳисоблаш миқдорининг уч бараваридан беш бараваригача миқдорда жарима солишга ёки 15 суткагача муддатга маъмурий қамоққа олишга сабаб бўлади).
Суд ҳуқуқбузар Ойбек Иброҳимовга жазо тури ва миқдорини тайинлашда жавобгарликни енгиллаштирувчи ва оғирлаштирувчи ҳолатларни — у томонидан содир этилган қилмишнинг ижтимоий хавфлилик хусусияти ва даражасини, шахсини, оилавий аҳволини, қилмишидан пушаймонлигини инобатга олиб, унга нисбатан модда санкциясида назарда тутилган жарима жазосини тайинлашни лозим топган. Суд қарорига кўра, Ойбек Иброҳимов Маъмурий жавобгарлик тўғрисидаги кодекснинг 183-моддасида назарда тутилган ҳуқуқбузарликни содир этган деб топилган. Унга нисбатан базавий ҳисоблаш миқдорининг уч баравари миқдорида — 669 минг сўм жарима солинган. Жаримани давлат фойдасига ундириш белгилаб қўйилган.
Маълумот ўрнида: Суд мажлиси очиқ ўтказилган бўлса-да, судья ишни аудио шаклида ёзиб олишга рухсат бермай, Олий суд пленумининг «Суд муҳокамаси ошкоралигини ва судлар фаолиятига доир ахборот олиш ҳуқуқини таъминлаш тўғрисида»ги қарорининг 14-бандига зид равишда иш кўрган. Яъни, суд мажлисида раислик қилувчи очиқ суд мажлисида аудиоёзувни амалга оширишга тарафлар розилигини олмасдан, рад жавобини берган, айни вақтда мухбирнинг илтимосномасини рад этиш ҳақида ажрим чиқариб бермаган.
Хулоса ўрнида
«Дарё» мухбири Мусулмонбек Иброҳимовнинг таъкидлашича, ОАВ эътибор қаратган долзарб мавзулар бўйича тезкор муносабат билдириши ва ижтимоий тармоқдаги кайфиятни кўтарувчи изоҳларидан Тошкент шаҳар ИИББ ва унинг ҳудудий тузилмалари зўр ишлаётгандек таассурот уйғонса-да, «ўтган бир йил давомида кузатганлари давомида, афсуски, бу ‘ялтироқ ислоҳотлар’нинг ортидаги ишлар ҳали кўнгилдагидек эмаслигига ўзи, ўз танида гувоҳи бўлган».«Республикада саноқли ҳисобланган тиббиёт муассасаларидан бирининг раҳбари содир этган номақбул хатти-ҳаракат устидан шикоят қилиб, орада ўзим айбдорга айланай деганим майли, шугина маъмурий иш бир йилга чўзилганидан аччиқланаман — вақти келса ‘беайб айбдор’лар тақдирини 15 дақиқага қолмай ҳал қила оладиган тизим нега бунга келганда ‘тормозланади’? Мен-ку журналист, ўрнимда журналист бўлмаган, ҳуқуқ кўчасидан узоқ, билиб-билмай ортиқча савол бериб қўйган бошқа ҳамюртимиз, нима, калтак еб ё ҳақорат эшитиб кетавериши керакми? Бош шифокори ўзини эплай олмай, қўл кўтарса, ички ишлар ходими калтак еган мурожаатчини ‘терпила’га чиқарса, судьяси залда бошқа қарорни ўқиб, ими-жимида муштумзўрга қулай бошқа қарорга қўл қўйса, додингни кимга айтасан?», — дейди у.
Изоҳ (0)