O‘tgan asrning 80-yillarida qizlarning aksariyati unga o‘xshashni istar edi. Yigitlar esa uning chiroyidan aqldan ozgan. Gap “Choliqushi” seriali qahramoni Feride haqida ketmoqda. Xo‘sh, 58 yoshni qarshi olgan aktrisa Aydan Shener haqida nimalar ma’lum?
“Muzlatkichda uxlayman”
2021-yilning 1-mart kuni Aydan 58 yoshini qarshi oldi. Biroq uning ko‘rinishi ancha yosh. Undan yoshlik va go‘zallik haqida so‘rashganida: “Men muzlatkichda uxlayman”, deya javob beradi. Shuningdek, tana parvarishiga jiddiy e’tibor qaratadi.
Masalan, sabzavot va baliqni ko‘proq iste’mol qiladi. Shirinliklarni unchalik ham yoqtirmaydi. Yuz terisi parvarishida tabiiy mahsulotdan – yangi meva, sabzavot va yogurtlardan niqob sifatida foydalanadi. Shu bilan birga, aktrisa barcha kabi go‘zallik muolajalarini qo‘llaganini hamda botoks ukollarini o‘tkazayotganini ham yashirmaydi.
Lekin yuz mushaklari harakatchanligini yo‘qotmasligi uchun unchalik ham chuqurlashib ketmaslikka harakat qiladi. Aydan sport bilan shug‘ullanmaydi, ammo juda uzoq masofalarni piyoda bosib o‘tadi. “Men hech qachon yosh ko‘rinishni yaxshi ko‘radigan ayol bo‘lmaganman. Faqatgina yaxshi ko‘rinishni xohlayman”, − deya aytib o‘tgan aktrisa intervyularning birida.
“Bolamdan ayrilishga bir baxya qolgan”
1988-yilda “Somon yo‘li” deb nomlangan navbatdagi serialni suratga olish vaqtida Aydan homilador edi. Epizodlarning birini suratga olish jarayonida Aydan yiqilib, hushidan ketgan. “Men uch yarim oylik homilador edim. Hamma meni bolasidan ayrildi, deb o‘ylagan”, − deydi aktrisa.
Yaxshiki, bunday bo‘lmagan. Aktrisa Eje ismli qizalog‘ini dunyoga keltirgan. Onasining go‘zalligini meros qilib olgan Eje hozir 33 yoshda. Eje ham aktyorlik bilimiga ega, chunki u bir qancha seriallarda rol ijro etgan. Biroq o‘zi ko‘proq arxitektura va dizaynga qiziqishini anglab yetib, ushbu yo‘nalish bo‘yicha tahsil olgan. Aydan qizini o‘zining yagona do‘sti deb biladi. Shuningdek, Ejeda Feridega o‘xshash xarakterlar borligini ham aytib o‘tgan.
Turmush o‘rtog‘i paranji sovg‘a qilganidan so‘ng ajrashgan
Aydan Shener 1983-yil 20 yoshida turkiyalik futbolchi Ayxan Akbin bilan turmush qurgan. Ayxan aktrisadan 8 yosh katta bo‘lib, u rafiqasini uy bekasi bo‘lishini orzu qilar edi.
O‘sha vaqtda Aydanning karyerasi cho‘qqiga qarab ko‘tarilayotgan paytlar. 1986-yilda “Choliqushi” seriali namoyishidan so‘ng aktrisa dunyo bo‘ylab mashhurlikka erishgan. Sportchi esa turmush o‘rtog‘ining sevimli ayolga aylanayotganidan aqldan ozgan edi. U Aydan oilasi uchun karyerasidan voz kechishiga ishonar edi.
“Turmush o‘rtog‘im uchun mashhurligim bir qancha qiyinchiliklar keltirdi, rashk qildi. Tug‘ilgan kunimning birida paranji sovg‘a qildi. Men musulmonman, yaratganga ishonaman. Ammo ro‘mol o‘ramayman, ayniqsa, paranji”, − deya yodga oladi aktrisa.
Shundan so‘ng er-xotin 1991-yilda − juftlikning qizi uch yoshga to‘lganida ajrashgan. Keyinchalik aktrisada yangi munosabatlar boshlangan, ammo hech biri nikohgacha yetib bormagan. Uning o‘zi tan olganidek, tajribasi tufayli qayta turmush qurishdan qaytgan: “Bir marta oila qurdim, qiz farzand ko‘rdim. Va men chin dildan shuni ayta olamanki, boshqa turmush qurish haqida o‘ylamaganman”.
Nogiron it bilan ijro
U o‘z vatani Turkiyada yashaydi. Aydanning uyida 20 dan ortiq mushuk va to‘rtta kuchuk yashaydi. Aktrisaning o‘zi uy hayvonlariga qo‘shiq kuylab beradi va ularni “mening bolalarim” deb ataydi.
Ko‘p yillar davomida aktrisa xayriya ishlari bilan shug‘ullangan, hayvonlarni himoya qilish bo‘yicha loyihalarda qatnashgan. Ayniqsa, u nogiron jonzotlardan xavotir oladi. Bunday hayvonlarga jamoatchilik e’tiborini qaratish uchun u g‘ayrioddiy reklamada suratga tushgan.
Kamron bilan do‘stlik
Aydan Kamron rolini ijro etgan Kenan Kalav bilan “Choliqushi” seriali suratga olinganidan buyon do‘st. Ular kamdan kam ko‘rishadi, lekin qo‘ng‘iroqlashib turadi. Ayni vaqtda aktyor ikkita mamlakatda yashaydi. Ispaniyada o‘g‘li Kankurt bilan uchta restoranni boshqaradi. Turkiyada esa filmlarda suratga tushishda davom etmoqda.
Qrimga tashrif
Aydan Shenerni teleshou va dasturlarda tez-tez ko‘rish mumkin. U teatrda ham faoliyat yuritadi. Shuningdek, reklama roliklarida ham ko‘rinish beradi. Uning ishtirokidagi “Deniz mening qalbimda” seriali 2017-yilda namoyish etilgan. 2013-yil sentabrda aktrisa Qrimga tashrif buyurgan edi. U yerda “Bog‘chasaroy yulduzi” serialining suratga olinishi to‘g‘risida muzokaralar olib borilgan. So‘ngra u Bog‘chasaroy Xoni saroyiga tashrif buyurgan: “Bir vaqtlar Sulton Sulaymon tashrif buyurgan, Usmonli imperiyasi va Qrim xonligi kesishgan joylarni ziyorat qilish men uchun juda muhim edi. ‘Ko‘z yoshlar favvorasi’ meni qoyil qoldirdi. Xon saroyi xafa qiladigan ko‘rinishga ega, ammo menga qayta tiklash ishlari olib borilayotganini aytishdi. O‘zim uchun juda kerakli ma’lumotlarga ega bo‘ldim”, − deya o‘z taassurotlari bilan bo‘lishgan Aydan.
Biroq bir yil o‘tib boshlangan suratga olish ishlari to‘xtatildi. Aytgancha, aktrisaning katta bobosi qozon-tatar, buvisi esa qrim-tatar. Ular XIX asrning ikkinchi yarmida Turkiya ko‘chib kelgan.
Aktrisaning xolasi ham yulduz
Aydanning xolasi – Suzan Avji o‘tgan asrning 60–70-yillarida ko‘plab filmlarda rol ijro etgan Turkiyaning xizmat ko‘rsatgan san’at arbobi hamda kino yulduzidir.
Suzan hozirda 84 yoshda bo‘lib, Aydan u bilan tushgan suratlarini Instagram sahifasida bo‘lishib turadi. “Sizning shu yerda ekanligingizdan xursandman, qadrli xolajonim”, − deb izoh qoldirgan aktrisa. Aytgancha, Suzan Avji ham ham jiyani singari ancha yosh ko‘rinadi.
Izoh (0)