Ўтган асрнинг 80 йилларида қизларнинг аксарияти унга ўхшашни истар эди. Йигитлар эса унинг чиройидан ақлдан озган. Гап «Чолиқуши» сериали қаҳрамони Фериде ҳақида кетмоқда. Хўш, 58 ёшни қарши олган актриса Айдан Шенер ҳақида нималар маълум?
«Музлаткичда ухлайман»
2021 йилнинг 1 март куни Айдан 58 ёшини қарши олди. Бироқ унинг кўриниши анча ёш. Ундан ёшлик ва гўзаллик ҳақида сўрашганида: «Мен музлаткичда ухлайман», дея жавоб беради. Шунингдек, тана парваришига жиддий эътибор қаратади.
Масалан, сабзавот ва балиқни кўпроқ истеъмол қилади. Ширинликларни унчалик ҳам ёқтирмайди. Юз териси парваришида табиий маҳсулотдан – янги мева, сабзавот ва йогуртлардан ниқоб сифатида фойдаланади. Шу билан бирга, актриса барча каби гўзаллик муолажаларини қўллаганини ҳамда ботокс уколларини ўтказаётганини ҳам яширмайди.
Лекин юз мушаклари ҳаракатчанлигини йўқотмаслиги учун унчалик ҳам чуқурлашиб кетмасликка ҳаракат қилади. Айдан спорт билан шуғулланмайди, аммо жуда узоқ масофаларни пиёда босиб ўтади. «Мен ҳеч қачон ёш кўринишни яхши кўрадиган аёл бўлмаганман. Фақатгина яхши кўринишни хоҳлайман», − дея айтиб ўтган актриса интервьюларнинг бирида.
«Боламдан айрилишга бир бахя қолган»
1988 йилда «Сомон йўли» деб номланган навбатдаги сериални суратга олиш вақтида Айдан ҳомиладор эди. Эпизодларнинг бирини суратга олиш жараёнида Айдан йиқилиб, ҳушидан кетган. «Мен уч ярим ойлик ҳомиладор эдим. Ҳамма мени боласидан айрилди, деб ўйлаган», − дейди актриса.
Яхшики, бундай бўлмаган. Актриса Эже исмли қизалоғини дунёга келтирган. Онасининг гўзаллигини мерос қилиб олган Эже ҳозир 33 ёшда. Эже ҳам актёрлик билимига эга, чунки у бир қанча сериалларда роль ижро этган. Бироқ ўзи кўпроқ архитектура ва дизайнга қизиқишини англаб етиб, ушбу йўналиш бўйича таҳсил олган. Айдан қизини ўзининг ягона дўсти деб билади. Шунингдек, Эжеда Феридега ўхшаш характерлар борлигини ҳам айтиб ўтган.
Турмуш ўртоғи паранжи совға қилганидан сўнг ажрашган
Айдан Шенер 1983 йил 20 ёшида туркиялик футболчи Айхан Акбин билан турмуш қурган. Айхан актрисадан 8 ёш катта бўлиб, у рафиқасини уй бекаси бўлишини орзу қилар эди.
Ўша вақтда Айданнинг карьераси чўққига қараб кўтарилаётган пайтлар. 1986 йилда «Чолиқуши» сериали намойишидан сўнг актриса дунё бўйлаб машҳурликка эришган. Спортчи эса турмуш ўртоғининг севимли аёлга айланаётганидан ақлдан озган эди. У Айдан оиласи учун карьерасидан воз кечишига ишонар эди.
«Турмуш ўртоғим учун машҳурлигим бир қанча қийинчиликлар келтирди, рашк қилди. Туғилган кунимнинг бирида паранжи совға қилди. Мен мусулмонман, яратганга ишонаман. Аммо рўмол ўрамайман, айниқса, паранжи», − дея ёдга олади актриса.
Шундан сўнг эр-хотин 1991 йилда − жуфтликнинг қизи уч ёшга тўлганида ажрашган. Кейинчалик актрисада янги муносабатлар бошланган, аммо ҳеч бири никоҳгача етиб бормаган. Унинг ўзи тан олганидек, тажрибаси туфайли қайта турмуш қуришдан қайтган: «Бир марта оила қурдим, қиз фарзанд кўрдим. Ва мен чин дилдан шуни айта оламанки, бошқа турмуш қуриш ҳақида ўйламаганман».
Ногирон ит билан ижро
У ўз ватани Туркияда яшайди. Айданнинг уйида 20 дан ортиқ мушук ва тўртта кучук яшайди. Актрисанинг ўзи уй ҳайвонларига қўшиқ куйлаб беради ва уларни «менинг болаларим» деб атайди.
Кўп йиллар давомида актриса хайрия ишлари билан шуғулланган, ҳайвонларни ҳимоя қилиш бўйича лойиҳаларда қатнашган. Айниқса, у ногирон жонзотлардан хавотир олади. Бундай ҳайвонларга жамоатчилик эътиборини қаратиш учун у ғайриоддий рекламада суратга тушган.
Камрон билан дўстлик
Айдан Камрон ролини ижро этган Кенан Калав билан «Чолиқуши» сериали суратга олинганидан буён дўст. Улар камдан кам кўришади, лекин қўнғироқлашиб туради. Айни вақтда актёр иккита мамлакатда яшайди. Испанияда ўғли Канкурт билан учта ресторанни бошқаради. Туркияда эса фильмларда суратга тушишда давом этмоқда.
Қримга ташриф
Айдан Шенерни телешоу ва дастурларда тез-тез кўриш мумкин. У театрда ҳам фаолият юритади. Шунингдек, реклама роликларида ҳам кўриниш беради. Унинг иштирокидаги «Дениз менинг қалбимда» сериали 2017 йилда намойиш этилган. 2013 йил сентябрда актриса Қримга ташриф буюрган эди. У ерда «Боғчасарой юлдузи» сериалининг суратга олиниши тўғрисида музокаралар олиб борилган. Сўнгра у Боғчасарой Хони саройига ташриф буюрган: «Бир вақтлар Султон Сулаймон ташриф буюрган, Усмонли империяси ва Қрим хонлиги кесишган жойларни зиёрат қилиш мен учун жуда муҳим эди. ‘Кўз ёшлар фаввораси’ мени қойил қолдирди. Хон саройи хафа қиладиган кўринишга эга, аммо менга қайта тиклаш ишлари олиб борилаётганини айтишди. Ўзим учун жуда керакли маълумотларга эга бўлдим», − дея ўз таассуротлари билан бўлишган Айдан.
Бироқ бир йил ўтиб бошланган суратга олиш ишлари тўхтатилди. Айтганча, актрисанинг катта бобоси қозон-татар, бувиси эса қрим-татар. Улар XIX асрнинг иккинчи ярмида Туркия кўчиб келган.
Актрисанинг холаси ҳам юлдуз
Айданнинг холаси – Сузан Авжи ўтган асрнинг 60–70 йилларида кўплаб фильмларда роль ижро этган Туркиянинг хизмат кўрсатган санъат арбоби ҳамда кино юлдузидир.
Сузан ҳозирда 84 ёшда бўлиб, Айдан у билан тушган суратларини Instagram саҳифасида бўлишиб туради. «Сизнинг шу ерда эканлигингиздан хурсандман, қадрли холажоним», − деб изоҳ қолдирган актриса. Айтганча, Сузан Авжи ҳам ҳам жияни сингари анча ёш кўринади.
Изоҳ (0)