O‘zbekiston tashqi ishlar vaziri Abdulaziz Komilov va Turkiya tashqi ishlar vaziri Mevlut Chavusho‘g‘li uchrashuvi bo‘lib o‘tdi, deya xabar bermoqda “Gazeta.uz”.
Ta’kidlanishicha, avval ikki vazirlik rahbarlari o‘rtasida tor doirada suhbat bo‘lib o‘tgan. Tor doiradan kengaytirilgan tartibdagi TIV rahbarlari boshchiligida Strategik rejalashtirish guruhining ikkinchi yig‘ilishiga o‘tildi.
Unda bo‘lajak qo‘shma tadbirlarga, xususan, oliy darajadagi O‘zbekiston—Turkiya strategik hamkorlik kengashining ikkinchi yig‘ilishiga tayyorgarlikning tashkiliy masalalari ko‘rib chiqildi.
Majlisda Turkiya delegatsiyasi o‘ziga xos turneni amalga oshirayotgani, O‘zbekistondan oldin Turkmanistonda bo‘lishgani, bundan keyingi manzil esa Qirg‘iziston ekanligi aytildi.
Shundan so‘ng ikki mamlakat delegatsiyalari rahbarlari O‘zbekiston va Turkiya tashqi ishlar vazirliklari o‘rtasida 2022—2023-yillarga mo‘ljallangan hamkorlik dasturi va Tarjima xizmatlari sohasida o‘zaro anglashuv memorandumini imzoladi.
Abdulaziz Komilov OAV vakillariga Turkiya prezidentining O‘zbekistonga rasmiy tashrifi 2021-yili amalga oshirilishi taklifi bildirilganini ma’lum qildi.
“Muzokaralar davomida oliy darajadagi o‘zbek—turk Strategik hamkorlik kengashining 2-yig‘ilishini o‘tkazish maqsadida Turkiya prezidenti Rajab Toyyib Erdo‘g‘on janobi oliylarini 2021-yilda o‘zlariga qulay bo‘lgan vaqtda O‘zbekistonga rasmiy tashrif buyurish taklifi yana bir bor bildirildi”, — dedi vazir.
O‘z navbatida Turkiya tashqi ishlar vaziri o‘z minnatdorligini bildirib, O‘zbekiston mustaqilligini tan olgan birinchi davlat Turkiya bo‘lgani va mamlakatda ochilgan ilk elchixona ham aynan shu davlatniki ekanini qayd etdi.
“Sal avval Abdulaziz akamizga o‘sha paytlarda bosh vazir, keyinchalik prezident (1993—2000 yillarda) bo‘lgan marhum Sulaymon Demirel maktubining bir nusxasini taqdim etdim”, — dedi u.
Turkiya vakili Oliy kengashning birinchi sammitida qabul qilingan qarorlar ijrosining borishi muhokama qilinganini ham qayd etdi.
Ma’lumot o‘rnida, O‘zbekiston va Turkiya o‘rtasida imtiyozli savdo to‘g‘risidagi bitimni imzolash shartlari muhokama qilinmoqda.
Bitim Prezident Shavkat Mirziyoyevning 2020-yilning fevralida Turkiyaga rasmiy tashrifi davomida erishilgan kelishuvlarda belgilangan va o‘zaro savdo hajmini 5 milliard dollarga oshirishning muhim vositasi sifatida qayd etilgan. Bitim bilan muayyan buyumlarga nisbatan bojxona bojlari qo‘llanilmasligi yoki ularning stavkasi sezilarli darajada pasaytirilishi reja qilingan.
Vazirlar uchrashuvidan so‘ng Mevlut Chavusho‘g‘li Prezident Shavkat Mirziyoyev qabulida bo‘ldi.
Izoh (0)