Xalqaro olimpiya qo‘mitasi (XOQ) Belarus prezidenti Aleksandr Lukashenkoning katta o‘g‘li — Viktor Lukashenkoning mamlakat Milliy olimpiya qo‘mitasi (MOQ) rahbari etib saylanganini tan olmadi, deb yozadi Meduza XOQning saytiga joylashtirilgan bayonotga tayanib.
Shuningdek, XOQ Belarus Xokkey federatsiyasi rahbari va Aleksandr Lukashenkoga yaqin shaxslardan biri Dmitriy Baskovning MOQ ijroiya qo‘mitasiga saylanganini ham tan olmadi, u Belarus OAVlari tomonidan minsklik Roman Bondarenkoning o‘limiga aloqadorlikda gumon qilinmoqda.
XOQ Belarus MOQ rahbariyatining Olimpiya o‘yinlarida ishtirok etishga qo‘yilgan taqiqni uzaytirishini va tashkilot bilan aloqani faqat uning bosh kotibi Polina Golovina orqali ushlab turishini ma’lum qildi.
Viktor Lukashenko 26-fevral kuni Belarus MOQ rahbari etib saylandi. Bungacha tashkilotga 24 yil mobaynida Aleksandr Lukashenko prezidentlik qilgan. Viktor Lukashenko 2019-yildan buyon MOQning vitse-prezidenti bo‘lib kelgan.
2020-yil dekabrida XOQ Aleksandr va Viktor Lukashenkolarga o‘z tadbirlariga, shu jumladan, Olimpiya o‘yinlariga tashrif buyurishni taqiqlab qo‘ydi. Bunday qaror belaruslik sportchilarning siyosiy sabablarga ko‘ra ta’qib qilinishi tufayli qabul qilingandi.
Dmitriy Baskov — Belarus Xokkey federatsiyasi rahbari, Aleksandr Lukashenkoning kenja o‘g‘li Nikolayning xokkey bo‘yicha shaxsiy murabbiyi. Noyabr oxirida Belarusning muxolifatchi Telegram-kanali Nexta Live e’lon qilgan yozuvlar Baskov namoyishchilarga qarshi hujumlarda qatnashgani haqida guvohlik bergan. Eng avvalo, u Minsk fuqarosi, rassom Roman Bondarenkoni do‘pposlaganlikda gumon qilindi, u bilan Minskning “O‘zgarishlar maydoni”dagi to‘siqdan oq-qizil-oq tasmalarni yechib olgan odamlar mushtlashuv uyushtirgan edi. Do‘pposlashlardan keyin Bondarenko vafot etgan.
Avvalroq Aleksandr Lukashenkoning to‘ng‘ich o‘g‘li Viktor Lukashenko 2021-yil 26-fevralda otasining o‘rniga Belarus Milliy Olimpiya qo‘mitasi (MOQ) prezidenti etib saylangach, Belarus prezidentining milliy xavfsizlik bo‘yicha yordamchisi lavozimidan ozod etilgani xabar berilgan edi. 45 yoshli Viktor Lukashenko 2005-yildan beri Belarus prezidentining yordamchisi lavozimini egallab kelgan. 2021-yil 26-fevralda u otasining o‘rniga Belarus Milliy Olimpiya qo‘mitasi (MOQ) prezidenti etib saylandi. Bunga qadar 1997-yil may oyidan buyon Aleksandr Lukashenko MOQ prezidenti sifatida faoliyat yuritib kelayotgan edi.
Undan avval esa Lukashenko hokimiyatni o‘g‘illariga topshirishi haqidagi mish-mishlarni rad etgan edi. “Ko‘p eshitsangiz kerak: hokimiyat tranziti, Lukashenko hokimiyatni hech bo‘lmaganda to‘ng‘ich o‘g‘liga topshiradi, u mamlakatda hukmronlik qiladi, degan gaplar yuradi. Mening oilamda bu hech qachon muhokama qilinmagan va muhokama qilinishi mumkin emasligini ham ko‘p aytganman. Chunki mendan keyin birorta farzandim Belarus prezidenti bo‘lmaydi”, — degan davlat rahbari Milliy Olimpiya qo‘mitasi (MOQ) yig‘ilishida.
Izoh (0)