Мактабгача таълим вазирлиги қашқадарёлик тадбиркор Ваҳоб Норсафаровнинг давлат-хусусий шериклик асосида ташкил этилган боғчасининг ёпилиш эҳтимоли ҳақидаги мақолага муносабат билдириб, тадбиркорнинг такрорий мурожаатлари халқ ва тадбиркорлар ўртасида норозилик кайфиятини уйғотиш сабаб бўлаётганини билдирди.
Вазирлик ахборот хизмати раҳбари Мавлуда Асқархўжаева томонидан тақдим этилган муносабатда «Реал келажак» нодавлат таълим муассасаси билан имзоланган битим Вазирлар Маҳкамасининг 2018 йил 22 ноябрдаги «Мактабгача таълим соҳасида давлат-хусусий шериклик шаклларини янада кенгайтириш чора-тадбирлари тўғрисида»ги 944-сонли қарори билан тасдиқланган низомга кўра тузилгани, бу шаклда тузилган битимларда эса ташкилот ишчи ходимларининг иш ҳақлари давлат бюджети ҳисобидан қопланиши кўзда тутилмагани таъкидланган.
«Ушбу битимга асосан лойиҳа қиймати 2 миллиард 700 миллион сўмни ташкил этиб, шундан 2 миллиард сўми вазирлик томонидан йўналтирилган имтиёзли кредит маблағи ва 700 миллион сўми ташаббускор маблағи ҳисобидан амалга оширилиши белгиланган. Мазкур битимда томонларнинг ҳуқуқлари ва мажбуриятлари келтирилган бўлиб, Мактабгача таълим вазирлиги томонидан олинган мажбуриятлар тўлиқ бажарилган. Хусусан, 2019 йил 5 августда ажратилган ресурс маблағлари ҳисобидан 2 миллиард сўм имтиёзли кредит маблағлари тадбиркорга тўлиқ ажратиб берилган. Тадбиркор томонидан ажратилган имтиёзли кредит маблағи ва ўз маблағи ҳисобидан реконструкция ишлари 2019 йил 25 сентябрда тугатилган ҳамда 7 октябрда давлат қабул комиссияси далолатномаси расмийлаштирилган. Ҳозирги кунда ушбу нодавлат мактабгача таълим ташкилоти ўз фаолиятини юритиб келмоқда», — дейилади вазирлик ахборотида.
Вазирликка кўра, ташкилот муассиси Ваҳоб Норсафаров ўзига берилган ёрдамларни тилга олмай, субсидия ажратилишини сўраб, Президентга, Мактабгача таълим вазирлигига, Ўзбекистон Республикаси Президенти ҳузуридаги тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакили омбудсманга такрорий мурожаатлар қилган. Шунингдек, вилоятда ташкил этилган сайёр қабулларда ҳамда ижтимоий тармоқларда ҳам «Реал келажак» НТМга педагог ишчи ходимлари иш ҳақига сарфланадиган харажатларни қоплаш учун республика бюджетидан субсидиялар ажратиш масаласида такрорий видеочиқишлар қилган.
«Таъкидлаш лозимки, ушбу низомга кўра ‘Реал келажак’ НТМ қуйидаги имтиёзлардан фойдаланиб келмоқда, — дея вазирлик тадбиркорга кўрсатилаётган ёрдамларни бирин-кетин санайди. — Биринчидан, 15 йил муддатга 3 йиллик имтиёзли давр билан 1 фоизлик ставкада 2 миллиард сўм миқдоридаги кредит маблағи берилган. Иккинчидан, нодавлат мактабгача таълим ташкилотлари харажатларининг бир қисмини қоплаш учун давлат мактабгача таълим ташкилотининг бир нафар тарбияланувчисига сарфланадиган сумманинг 50 фоизига қадар миқдорда давлат бюджетидан субсидиялар ажратиб келинмоқда. Учинчидан, НМТТ ўз фаолиятини амалга ошира бошлагандан кейин ўн йил мобайнида барча турдаги солиқлар ва давлат мақсадли жамғармаларига мажбурий ажратмалар тўлашдан озод қилинган. Тўртинчидан, давлат-хусусий шериклик тўғрисидаги битим имзоланган ойдан бошлаб ўн йил муддатга ягона ижтимоий тўлов ставкаси 5 фоиз миқдорида тўлов амалга ошириб келинмоқда».
Вазирлик ахборот хизматининг тушунтиришича, Президентнинг 2018 йил 5 апрелдаги қарорининг 97-банди охирги хатбошисида «мактабгача таълим муассасасининг раҳбарлари, методистлари, тарбиячилари, дефектологлари, психологлари, мусиқа ходимлари иш ҳақига сарфланадиган харажатларни қоплаш учун давлат мактабгача таълим муассасалари учун белгиланган шартларда қўшимча бюджет субсидияларини олиш ҳуқуқига эга» эканлиги кўрсатиб ўтилган. Ушбу банд қарорда санаб ўтилган давлат-хусусий шерикликнинг 9 та шаклидан бири, яъни 12-бобда келтирилган шаклига тегишли бўлиб, бунда хусусий шерик мулки негизида ташкил этилган нодавлат мактабгача таълим муассасаларини моддий таъминлаш шаклидаги давлат-хусусий шерикликни амалга ошириш тартиби ва имтиёзлари белгиланган. Ушбу бобда келтирилган имтиёз, мактабгача таълим соҳасидаги давлат-хусусий шерикликнинг бошқа шаклларига татбиқ этилмаслиги кўрсатиб ўтилган.
«‘Реал келажак’ НТМ томонидан ташкил этилган нодавлат мактабгача таълим ташкилоти моддий таъминлаш шаклида эмас, балки эски меҳмонхона биносини вазирлик томонидан йўналтирилган имтиёзли кредит ҳисобидан реконструкция қилиб, жиҳозлаш орқали юқоридаги 944-сонли қарор асосида ташкил этилган. НТМ бошқарувчиси Ваҳоб Норсафаровнинг шу мазмундаги аввалги мурожаатларига вазирлик томонидан 2019 йил 2 октябрда, 30 октябрда, 2020 йил 22 апрелда, 2 июнда ҳамда Ўзбекистон Республикаси Президенти ҳузуридаги тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакили Д.Қосимовнинг 2020 йил 14 майдаги жавоб хатлари орқали тушунтиришлар берилган», — дейди вазирлик ахборот хизмати масъуллари.
Вазирлик томонидан қўшимча қилинишича, тадбиркор талаб қилгандек амалдаги ушбу қарорларга тегишли ўзгартириш киритилиши мактабгача таълим соҳасида жорий этилган давлат-хусусий шериклик шаклларининг мазмуни ва моҳияти кескин ўзгаришига олиб келади ҳамда давлат бюджетидан қўшимча сарф-харажатларни талаб этади. Шу сабаб вазирлик тадбиркорнинг талабини мақсадга мувофиқ эмас, деб топган.
Мактабгача таълим вазирлигининг таъкидлашича, тадбиркор Ваҳоб Норсафаровнинг такрорий видеомурожаатларида давлат томонидан «Реал келажак» НТМга тақдим этилган имтиёзларга тўхталиб ўтилмай, ҳукумат ва вазирлик раҳбарларига нисбатан асоссиз ва ноўрин фикрлар билдириб келинмоқда. Бу орқали тадбиркор икки томонлама имзоланган битимда белгиланган мажбуриятларини бажармасликни мақсад қилган.
«Фуқаро Ваҳоб Норсафаров томонидан мактабгача таълим соҳасида олиб борилаётган ислоҳотларни ҳамда ҳукуматимиз томонидан тадбиркорларга яратилган имтиёз ва имкониятларни нотўғри талқин қилиб келаётганлиги, халқимиз ва тадбиркорлар ўртасида норозилик кайфиятини уйғотишга ўз таъсирини кўрсатмоқда», — дейилади вазирлик муносабатида.
Изоҳ (0)