Qashqadaryo viloyatida iste’molga yaroqsiz 800 kilogramm go‘shtni noqonuniy ravishda olib ketayotgan shaxslar aniqlandi, deya xabar qilmoqda viloyat ichki ishlar boshqarmasi.
Qashqadaryo viloyati IIB PPX va Jinoyat tergov surishtiruv bo‘limi karantin bo‘linmasi va YXHB xodimlari tomonidan Chiroqchi tuman hududida joylashgan “Umakay” muntazam YPX maskanida 2021-yil 6-mart kuni soat 03:10 larda Qashqadaryo—Toshkent yo‘nalishida harakatlanib ketayotgan, Koson tumanda yashovchi A.B. boshqaruvidagi Cobalt to‘xtatilgan.
Avtomashinaning saloni va yukxonasi ko‘zdan kechirilganda, hech qanday veterinariya ma’lumotnomalarisiz har xil qora sellofan paket va qog‘oz qadoqlarda suyaksiz jami 800 kilogramm og‘irlikdagi go‘sht mahsulotlari borligi aniqlangan.
Go‘sht mahsulotlari Chiroqchi tuman oziq-ovqat mahsulotlari xavfsizligi mikrobiologiya va veterinariya-sanitariya ekspertiza laboratoriyasida tekshirilganda, iste’molga yaroqsizligi ma’lum bo‘lgan.
Holat yuzasidan surishtiruv harakatlari olib borilmoqda.
Bundan avval Navoiyda sanitariya qoidalarini buzgan holda 15 bosh qo‘y go‘shtini Toshkentga olib kelayotgan Cobalt haydovchisi jarimaga tortilgani, Farg‘onada mushuk go‘shtini sotganlar ushlangani to‘g‘risidagi xabarlar rad etilgani hamda Sirdaryoda iste’molga yaroqsiz deb topilgan 210 kg go‘sht mahsulotlari yo‘q qilingani haqida xabar berilgandi.
Izoh (0)