Mahalla va oilani qo‘llab-quvvatlash vaziri Rahmat Mamatov Qashqadaryo viloyatining Dehqonobod tumanida ko‘chat ekish bo‘yicha master-klass o‘tib berdi, deya xabar berdi “Daryo” muxbiri.
Ma’lum bo‘lishicha, vazir Rahmat Mamatov va DXA direktori Ulug‘bek Muhammadiyev 2021-yil 4-mart kuni prezident topshirig‘iga ko‘ra, Qashqadaryo viloyatining Dehqonobod tumanida bo‘lib, hududda “Obod mahalla” davlat dasturiga muvofiq amalga oshirilayotgan ishlar bilan tanishgan.
“Vazir Rahmat Mamatov hamda Davlat xizmatlari agentligi direktori Ulug‘bek Muhammadiyevlar tumanimizning ‘Gumbuloq’ mahallasida bo‘lib, ‘Obod mahalla’ davlat dasturi bo‘yicha amalga oshirilayotgan ishlarni ko‘rdi. Kuzatdi va maslahat berdi”, — deydi Dehqonobod tumani hokimi Zoir Aliqulov.
Tuman hokimining ma’lumot berishicha, har ikkala rahbar viloyatning Chiroqchi hamda Dehqonobod tumaniga biriktirilgan bo‘lib, ular hududda olib borilayotgan ishlarga bosh-qosh bo‘ladi.
“Quvonarlisi, vazirimiz Rahmat Mamatov ko‘chatni to‘g‘ri ekish bo‘yicha bizga master-klass ham o‘tib berdi”, — deydi tuman Mahalla va oilani qo‘llab-quvvatlash bo‘limi boshlig‘i Nodir Ismoilov.
Ta’kidlanishicha, vazir va DXA direktori tashabbusi bilan hududga olib kelingan 600 dona ko‘chat shu kunning o‘zida ekib chiqilgan. Qolaversa, tuman tibbiyot birlashmasi sa’y-harakati bilan shu kuni mahalladagi ayollar va yoshlar tibbiy ko‘rikdan o‘tkazilgan.
“Shu kuni hududdagi endigina turmush qurgan, ammo hali nikohi rasmiy qayd etilmagan oilalarning nikoh guvohnomalari topshirildi. Shuningdek, ta’mirtalab yo‘llar ta’mirlandi. Aholiga uzunligi 52 metr va 10 metr balandlikdagi osma ko‘prik qurilishi boshlab berildi”, — deydi tuman hokim o‘rinbosari Nodir Ismoilov.
Eslatib o‘tamiz, avvalroq prezident Shavkat Mirziyoyev “Hafta o‘rtasida birorta vazirni Toshkentda ko‘rsam, ishdan olaman”, degandi. Shundan so‘ng, barcha vazirlar hududlarga yo‘l olib, aholini qiynab kelayotgan muammolarni o‘rganishga kirishgandi.
Izoh (0)