UzAuto Motors kompaniyasida 2—3-mart kunlari bo‘lib o‘tgan press turda texnik nosozlik tufayli sotilgan avtomobillarning chaqirib olingan holatlari haqida ma’lumot berildi.
“Daryo” muxbiri Musulmonbek Ibrohimovning kompaniya bosh direktori Rustam Rajabov bergan ma’lumotlarga asoslanib xabar berishicha, 2020-yilda Rossiyada sotilgan UzAuto Motors’ning 5 mingta avtomobili texnik nosozlik tufayli chaqirib olingan.
“Rossiyada ERA-GLONASS – baxtsiz hodisalar sodir bo‘lganda Rossiya favqulodda vaziyatlarni bartaraf etish tizimi mavjud. Bu kabi tizim O‘zbekistonda yo‘q. Avtomobil ichiga o‘rnatiladigan mikrosxema yo‘l transport hodisasi yuz berganda o‘sha tizimga sputnik orqali signal beradi. Rossiya qonunchiligiga ko‘ra, ushbu mikrosxemani avtomashinaga ishlab chiqaruvchi tomonidan o‘rnatish talabi mavjud. Biz ishlab chiqargan avtomobillarning ERA-GLONASS mikrosxema ishlamay qolgan. O‘rnatilgan mikrosxema Italiyadagi kompaniya tomonidan ishlab chiqarilgan edi. Muammoni bartaf etish uchun 5 mingta mashinani chaqirtirib, mikrosxemani almashtirib berganmiz. Xarajatlarimizni aybdor – yetkazib beruvchi korxona qoplagan”, — dedi kompaniya boshqaruvchisi.
Rajabovning ta’kidlashicha, yana bir holatda, ya’ni Lacetti va Nexia’da avtomat uzatgichning richagi o‘ynab qolishi haqida internetda tarqalgan xabarlar o‘rganib chiqilgan.
“Biz uni o‘rganib, muammo qayerda ekaniga aniqlik kiritdik. Avtomat uzatgich richagini ishlab chiqargan korxona aybdor bo‘lib chiqdi. Aniqlashimizcha, bizga ushbu richagni yetkazib beruvchi Koreyadagi ishlab chiqaruvchi korxona jarayonni noto‘g‘ri bajargan. Shu partiyada 8 mingdan ortiq avtomobil sotilgan edi. Biz barcha mijozlarga o‘z hisobimizdan nosoz qismni yangisiga almashtirib berdik”, — dedi u.
Kompaniya rahbari aynan qaysi nomdagi ishlab chiqaruvchilar nosoz avtomobil qismlarini yetkazib berganini aytolmasligini qo‘shimcha qildi.
Avvalroq O‘zbekistonda Spark, Nexia, Cobalt va Lacetti xaridi uchun shartnoma berish 3-martdan qayta tiklanishi, O‘zbekistonda Chevrolet Onix 9—12 ming dollar atrofida sotilishi kutilayotgani hamda UzAuto Motors Lacetti’ning yangi Redline modelini ishlab chiqarishni boshlagani haqida xabar berilgan edi. Shuningdek. UzAuto Motors kompaniyasi barcha avtomobillar narxini pasaytirish ustida ishlanayotganini ma’lum qilgan.
Izoh (0)