Hujumchilar ham havas qiladi: dunyoning eng qimmat markaziy himoyachilari

Joriy 2020/21-yilgi mavsum zamonaviy futbolda markaziy himoyachining o‘rni nihoyatda beqiyos ekanligini ko‘rsatdi. Ushbu mavsum davomida manaman degan grand jamoalar himoyadagi muammolarga duch keldi va hamon bu muammolardan aziyat chekmoqda. Ba’zi klublarda jarohat olgan himoyachilar ko‘p bo‘lsa, boshqalarida shunchaki bu pozitsiyada yuqori darajadagi o‘yinchilar yo‘q. Mavsum yakunida hujumchilar uchun bo‘lgani kabi, mudofaa vakillari uchun ham shiddatli kurash kechishi aniq. FootballHD nashri Transfermarkt portali ma’lumotlariga ko‘ra dunyoning ayni damdagi eng qimmat markaziy himoyachilari haqida material tayyorladi. Quyida ushbu maqola o‘zbek tilida taqdim etiladi.

David Alaba — 55 million yevro

Alaba yuqori darajali himoyachi shu sababli “Bavariya” uning shartnomani uzaytirmoqchi emasligidan afsusda. Ammo ushbu mavsumda avstriyalik Myunxen klubining butun boshli himoyasi singari o‘zini yaxshi tomondan ko‘rsata olmayapti. Joriy 2020/21-yilgi mavsum “rekordmeyster” Bundesligada 31 ta gol o‘tkazib yuborishga ulgurdi — bu deyarli avvalgi ikki mavsumdagi bilan bir xil natijadir. Balki vaziyatning o‘zgarishi futbolchiga yaxshi tomondan ta’sir ko‘rsatar. “Bavariya” bilan Alaba barcha sovrinlarni qo‘lga kiritdi va ehtimol, u ishtiyoqni yo‘qotgandir. Agar mish-mishlarga ishonilsa, himoyachi yangi mavsumda muvaffaqiyatlarini “Real” bilan birga takrorlashga harakat qilib ko‘radi.

Kalidu Kulibali — 60 million yevro

Kulibali “Napoli”ning asosiy aktivi hisoblanadi. Neapolliklar mana bir necha yildirki, himoyachini o‘z safiga qo‘shib olishni xohlagan boshqa klublarning hamlalarini qaytarish bilan shug‘ullanmoqda. Ayniqsa “Manchester Siti” senegallik uchun jiddiy kurashga kirgandi, ammo futbolchi yakunda baribir Neapolda qoldi. Klub futbolchini yana qancha vaqt ushlab tura oladi, mana shu hamon katta savolligicha qolmoqda. Kulibalining esa yoshi o‘tib bormoqda (hozir 29 yoshda), “Napoli” esa nufuzli sovrinlar uchun kurashishga qodir jamoaga o‘xshamayapti. Senegallikning yozda Neapolni tark etishi kutilmoqda. Futbolchining shartnomasi esa 2023-yilning yozigacha amal qiladi.

Aymerik Lyaport — 60 million yevro

Lyaport bir muddat “Manchester Siti” tarixidagi eng qimmat himoyachi bo‘lib turgan. 2018-yilning yanvar oyida “shaharliklar” futbolchining transferi uchun 65 million yevro to‘lagandi. Ammo Aymerikni “Siti”ning eng muvaffaqiyatli markaziy himoyachisi deb atash biroz qiyinroq. 2018/19-yilgi mavsumda fransiyalik Xosep Gvardiola jamoasining asosiy himoyachisi edi. Ammo u 2019/20-yilgi mavsumning katta qismini tizzasidan olgan jarohati tufayli o‘tkazib yubordi. Hozirgi mavsumda esa deyarli o‘ynamayapti. Bir tomondan, “shaharliklar” Ruben Diash bilan shartnoma imzoladi, u esa darhol asosiy himoyachiga aylandi. Boshqa tomondan, kutilmaganda Jon Stounz ajoyib o‘yin ko‘rsata boshladi. Aynan shu ikki himoyachi hozirda Gvardiola jamoasining muvaffaqiyatlarida katta o‘rin tutmoqda. Lyaportga esa shunchaki maydonda joy yetmayapti.

Ruben Diash — 60 million yevro

“Manchester Siti” bir necha yil davomida malakali himoyachilarni axtarish bilan shug‘ullandi. Bu vaqt ichida “Etihad”dan millionlab yevro uchib ketdi. Nihoyat, “shaharliklar” izlagan futbolchisini topishga muvaffaq bo‘ldi. 2020-yilning sentabr oyida ingliz klubi “Benfika”dan Ruben Diashni 68 million yevroga sotib oldi. Bu safar oldingilaridan farqli o‘laroq “Siti” adashmadi. Portugaliyalik hozirda “Siti” g‘alabali seriyasining muhim elementi bo‘lib, barcha musobaqalarda jami 19 ta uchrashuv o‘tkazdi. Diash va Stounz juftligi nafaqat Angliyada, balki butun Yevropada ham eng yaxshilaridan bo‘lib turibdi. Aynan himoya chizig‘ining kuchayishi bilan “Manchester Siti” APL va Chempionlar Ligasida g‘olib bo‘lish uchun asosiy da’vogarga aylandi.

Dayo Upamekano — 60 million yevro

Upamekano Yevropaning eng iqtidorli himoyachilaridan biri hisoblanadi. Yigitcha atigi 22 yoshda, ammo u allaqachon “Leypsig”ning asosiy futbolchisi bo‘lib, Chempionlar Ligasida o‘ynamoqda. Shuningdek, Bundesligada chempionlik uchun o‘zining bo‘lajaka jamoasi “Bavariya” bilan kurashni davom ettirmoqda. Futbolchi mavsum oxirida aynan Myunxen klubiga ko‘chib o‘tadi. Fransuzga Angliya klublaridan jiddiy qiziqishlar bo‘lgandi, ammo u Germaniyani tark etmaslikka qaror qildi. “Bavariya”ga Upamekanoning transferi nisbatan arzonroq tushdi. Hozirgi sharoitda yuqori darajali markaziy himoyachi uchun 42,5 million yevro unchalik katta pul emas. “Rekordmeyster” Alabaning ketishidan qattiq tashvishdaligi rost, ammo klub avstriyalikning o‘rnini juda yaxshi kadr bilan yopdi deb bemalol aytish mumkin.

Xose Ximenes — 65 million yevro

Ximenes “Atletiko”ning eng muhim o‘yinchilaridan biridir. Garchi uni ko‘p hollarda jarohatlar qiynasa ham, u asosiy tarkib futbolchisi maqomini yo‘qotmaydi. Yana bir jihat ham borki, urugvaylik himoyachilar hujumchilarga qaraganda ko‘proq qadrlanadigan jamoada to‘p suradi. Ximenes “Atletiko”ga qo‘lidan kelganicha yordam beradi va uning harakatlar besamar ketmayapti. Diyego Simeone qadrlaydigan futbolchiga boshqa klublar ham doimiy ravishda ko‘z tikib turadi. 2019/20-yilgi mavsum so‘nggida “Chelsi” unga jiddiy qiziqish bildirgan edi, ammo “matraschilar” uni yaqin orada hech qayerga qo‘yib yuborishmasa kerak. Madrid klubi hamshaharlaridan farqli o‘laroq qimmatbaho va noyob kadrlarni shunchaki kimgadir berib yubormaydi.

Rafael Varan — 70 million yevro

Varanning professional va yuqori darajali o‘yinchi ekaniga hech kim shubha qilmaydi. Ammo so‘nggi paytlarda u o‘z imkoniyatlaridan pastroq darajada o‘yin ko‘rsatmoqda. Hammasi o‘tgan mavsumda, “Manchester Siti”ga qarshi Chempionlar Ligasi pley-off bosqichida boshlandi va bu hamon davom etmoqda. Fransuz muntazam ravishda xatolarga yo‘l qo‘ymoqda va eng yomoni, uni qo‘llab-quvvatlaydigan hech kim yo‘q. Varan Serxio Ramos bilan birgalikda barqaror va xotirjamroq o‘ynaydi, ammo ispaniyalik yo‘q paytlarda, albatta, nimadir sodir bo‘ladi. Ehtimol, Varan sardor (Ramos) bo‘lmaganida “Real”ning yetakchi himoyachisi bo‘lish bosimiga dosh bera olmayotgandir. Ammo futbolchining maqomi, qo‘lga kiritgan sovrinlari soni va transfer narxi hisobga olinsa, bunday deyish biroz erish tuyulishi ham mumkin.

Markinyos — 70 million yevro

Tiago Silva jamoadan ketganidan so‘ng PSJ himoyasi uchun javobgarlik Markinyosga yuklatildi. Fransiya klubi sardori nafaqat asosiy ishini bajaradi, balki vaqti-vaqti bilan gollar ham urib turadi. PSJ va Markinyos bir-biriga juda mos keladi. Parijda o‘tkazgan 7,5 yil davomida braziliyalik jamoaning haqiqiy yetakchisiga aylandi va sardorlik bog‘ichiga yetib keldi. Ehtimol, Markinyos faoliyatini aynan PSJda tugatsa kerak. Ayni paytda esa himoyachini Parijdan tashqarida tasavvur qilish qiyin. Futbolchi o‘zini yaxshi his qiladigan klubning yetakchisidir va shu sababli tomonlarga uzoq va samarali hamkorlik kafolatlangan.

Matteys de Ligt — 75 mln yevro

Ko‘pchilik “Yuventus” 2019-yilning yozida de Ligt uchun “Ayaks”ga 85 million yevro to‘laganida hayratga tushgandi. Buning ustiga futbolchining o‘zi ham yangi jamoada darhol o‘ynab keta olmadi. Biroq yosh himoyachi bosimni yengib, Turin klubining asosiy tarkib o‘yinchisiga aylanishga muvaffaq bo‘ldi. De Ligt atigi 21 yoshda, ammo u allaqachon ulkan tajriba orttirishga muvaffaq bo‘lgan. Matteys bungacha “Ayaks” sardori bo‘lgan va Niderlandiya terma jamoasi safida 21 ta uchrashuvda maydonga tushgan. Ammo de Ligt dunyoning eng qimmat himoyachilaridan biri maqomida bo‘lishiga qaramay o‘rganishi kerak bo‘lgan narsalari hali ko‘pligini tushunadi va o‘zini kamtarona tutadi.

Virjil van Deyk — 80 million yevro

Qizig‘i, ushbu ro‘yxatning dastlabki ikki pog‘onasini Niderlandiya terma jamoasi futbolchilari egalladi. Van Deyk hozirda dunyoning eng qimmat himoyachisi bo‘lib turibdi. Bunga hatto mavsum boshida olgan jiddiy jarohati ham ta’sir o‘tkaza olmadi. Ammo himoyachining jarohati “Liverpul”ning o‘yinlariga jiddiy ta’sir ko‘rsatmoqda. Hozirda “qizillar” nafaqat APLda g‘olib bo‘lish imkoniyatidan mosuvo bo‘lmoqda, balki kelasi mavsumda Chempionlar Ligasi yo‘llanmasidan ham quruq qolishi mumkin. Aynan van Deykning jarohatidan so‘ng mersisaydliklar ketma-ket muammolarga duch kela boshladi va bu chinakamiga falokatga aylandi. Bugungi “Liverpul” har qanday jamoa uchun malakali markaziy himoyachilar qanchalik muhimligini isbotlab turibdi.