Moda doimo o‘zgarib turadi va bir necha yil oldin urfda bo‘lgan narsa bugungi kunda obrazni buzishi mumkin. Quyida garderobingizdan qaysi sviterlarni olib tashlash vaqti kelganligi haqida to‘xtalamiz.
Yopishib turuvchi sviter
Bunday sviterda qomatning ba’zi kamchiliklari ko‘zga yaqqol tashlanadi. Bundan tashqari, tanaga yopishib turuvchi modellar issiqlikni yaxshi ushlolmaydi, shu sababli odam bunday sviterda tez sovqotadi. Ma’lumki bu kabi sviterlar doimo yuqoriga yig‘ilib qoladi, ularni vaqti-vaqti bilan tuzatib turishga to‘g‘ri keladi, bu esa noqulaylik tug‘diradi. Buning o‘rniga keng, oversize bichimdagi sviterlarni tanlang. Ularni jinsi shim yoki yubka kamariga kirgizgan holda kiyish mumkin.
Uzun, tor sviter
Bir vaqtlar shim ustidan tushib turuvchi uzun, tor sviter urfga kirgandi, lekin hozir unday emas. Birinchidan, bu juda g‘alati tuyuladi – qalin mato ostidan shim choklari va kamari bilinib turadi, pastki chiziq vizual tarzda oyoqlarni ajratib qo‘yadi, natijada tana nomutanosib ko‘rinadi. Umuman olganda, bu kabi kombinatsiya ham qulay emas — bunday sviterlar harakatni ma’lum ma’noda cheklaydi va ularni doimo pastga tortib turish lozim.
To‘rli sviter
Birinchidan, bunday sviterni sovuq kunlarda kiyishning umuman foydasi yo‘q. Ikkinchidan, zich trikotaj yoki jun matolari atrofidagi to‘rlar bir-biriga mos tushmaydi, bu kamida bachkana bo‘lib ko‘rinadi.
Kesilgan bichimdagi sviter
Qishda sizga kerak bo‘lmaydigan yana bir model. Bunday sviter isitmaydi, bundan kelib chiqadiki, bunday model qish mavsumi uchun to‘g‘ri tanlov emas. Agar qomatingizga urg‘u berishni istasangiz, yaxshisi V simon bo‘yinli junli jemperlarni tanlang.
Sun’iy tosh, munchoq va biserli sviter
Agar sviterdagi munchoq va biserli bezak tashqi ko‘rinishga yorqinlik qo‘shadi deb o‘ylasangiz, adashasiz. Bunday kombinatsiya arzon va bachkana ko‘rinadi. Agar atrofdagilarning e’tiborini tortmoqchi bo‘lsangiz, diqqatingizni urfdagi rang yoki printlarga qaratganingiz ma’qul.
Burmali sviter
Qishda bunday modelni kiyishni maslahat bermaymiz, chunki sviterdagi katta burmalar qomatingizga qo‘shimcha hajm qo‘shadi, shuningdek, ustki kiyim bilan kiyganda noqulaylik tug‘diradi.
Shaklsiz sviter
Bugungi kunda oversize kiyimlar urfda, shu sababli qalin, pishiq matodan tikilgan sviter tanlash juda muhimdir. Cho‘zilib ketganga o‘xshab ko‘rinadigan ingichka matolardan tayyorlangan modellar qomatingizni tartibsiz va didsiz ko‘rsatadi.
Rang-barang sviter
Bu bilan faqatgina sokin rangdagi sviter kiyish kerak demaymiz, asosiysi me’yorni bilishdir. Turli xil ranglarning betartib aralashmasi obrazni kamida qo‘pol ko‘rsatadi. Agar ranglarga tayangan holda obraz yaratmoqchi bo‘lsangiz, unda siz uchun monoxrom modellarni tanlash yoki rangli blok texnikasi yordamida tayyorlangan sviterlar yaxshi tanlov bo‘ladi.
Mavzuga doir:
Izoh (0)