AQShning kosmik ishlanmalar agentligi Xalqaro kosmik stansiyada (XKS) gipertovushli raketalar parvozini kuzatish uchun uskunalarni sinovdan o‘tkazishni rejalashtiryapti. Bu haqda Amerikaning ixtisoslashgan SpaceNews saytiga tayanib “Korrespondent.net” xabar berdi.

Ta’kidlanishicha, infraqizil diapazonda ishlovchi Persistent Infrared Payload qurilmasi Northrop Grumman kompaniyasining stansiyaga iyul oyida uchib boruvchi Cygnus yuk tashuvchi havo kemasi bortiga joylanadi.

Tajriba kosmik kema XKSda bo‘lgan payt amalga oshiriladi va gipertovushli va ballistik raketalarning parvozini aniqlash uskunalarini ishlab chiqish uchun zarur bo‘lgan ma’lumotlarni yig‘ish imkonini beradi. Kelajakda ushbu uskunani raketa hujumi to‘g‘risida ogohlantiruvchi  past orbita sun’iy yo‘ldoshlariga o‘rnatish rejalashtirilgan.

2020-yilning iyun oyida Northrop Grumman kompaniyasi mazkur tajriba uchun Kosmik rivojlanish agentligi bilan 13,8 million dollarlik shartnoma imzolagan edi.