Toshkentning Yashnobod tumanida yuk mashinasi issiqlik quvurlariga kelib urilgani oqibatida havodan o‘tuvchi issiqlik quvurlarida avariya holati vujudga keldi, deb xabar bermoqda tuman hokimligi matbuot xizmati.
Voqea 24-fevral kuni soat 22:00 atrofida yuz bergan. Yuk mashinasi Ohangrabo ko‘chasida joylashgan 17-, 20-, 2-uylar va 435-maktabgacha ta’lim muassasasiga boruvchi Du219/102/57 issiqlik quvurlariga urilgan.
“Hozirgi kunda ‘Toshissiqquvvati’ DUK Yashnobod tuman boshqarmasi tomonidan avariya holatini bartaraf etish bo‘yicha tezkor chora tadbirlar ko‘rilib, aholiga issiqlik energiyasini uzluksiz va sifatli yetkazib berish uchun yangi issiqlik quvurlarini montaj qilish chora-tadbirlari ko‘rilmoqda”, — deyiladi hokimlik xabarida.
Qayd etilishicha, 1-mart kuni soat 10:00 dan 22:00 gacha yangi issiqlik quvurlarini montaj qilish ishlari olib borilishi munosabati bilan Uysozlar va Ohangrabo ko‘chalarida joylashgan 70 ta ko‘p qavatli uy, 2 ta maktab, 1 ta bog‘cha issiqlik tizimidan o‘chiriladi.
“Toshissiqquvvati” DUK Yashnobod tuman boshqarmasi keltirilgan noqulayliklar uchun uzr so‘ragan.
Izoh (0)