Тошкентнинг Яшнобод туманида юк машинаси иссиқлик қувурларига келиб урилгани оқибатида ҳаводан ўтувчи иссиқлик қувурларида авария ҳолати вужудга келди, деб хабар бермоқда туман ҳокимлиги матбуот хизмати.
Воқеа 24 февраль куни соат 22:00 атрофида юз берган. Юк машинаси Оҳанграбо кўчасида жойлашган 17-, 20-, 2-уйлар ва 435-мактабгача таълим муассасасига борувчи Ду219/102/57 иссиқлик қувурларига урилган.
«Ҳозирги кунда ‘Тошиссиққуввати’ ДУК Яшнобод туман бошқармаси томонидан авария ҳолатини бартараф этиш бўйича тезкор чора тадбирлар кўрилиб, аҳолига иссиқлик энергиясини узлуксиз ва сифатли етказиб бериш учун янги иссиқлик қувурларини монтаж қилиш чора-тадбирлари кўрилмоқда», — дейилади ҳокимлик хабарида.
Қайд этилишича, 1 март куни соат 10:00 дан 22:00 гача янги иссиқлик қувурларини монтаж қилиш ишлари олиб борилиши муносабати билан Уйсозлар ва Оҳанграбо кўчаларида жойлашган 70 та кўп қаватли уй, 2 та мактаб, 1 та боғча иссиқлик тизимидан ўчирилади.
«Тошиссиққуввати» ДУК Яшнобод туман бошқармаси келтирилган ноқулайликлар учун узр сўраган.
Изоҳ (0)