Арманистонда бош вазирга қарши намойишчилар ҳукумат биносига бостириб кирди (видео)

Арманистон пойтахти Ереванда мухолифатчилар гуруҳи полиция тўсиғини ёриб ўтиб, ҳукумат мажмуаси биноларидан бирига кирди, деб хабар беради «Коммерсантъ». Улар бош вазир Никол Пашиняннинг истеъфосини талаб қилди. Акция ташкилотчилари — «Дашнакцутюн» мухолифат партиясининг ёшлар иттифоқи.

«Биз Пашиняннинг истеъфосини талаб қиламиз. Ўз акциямиз билан биз учун ёпиқ эшиклар йўқлигини ва биз ҳар қандай ҳукумат биносига кира олишимизни кўрсатдик», — дея «Интерфакс» акция иштирокчиларидан бирининг гапини келтирди.

«РИА Новости» хабарига қараганда, мухолифатчилар биринчи қаватда акция ўтказган. Улар вазирликлар ходимларини Никол Пашинян тарафдорларининг митингида қатнашмасликка чақирган. Акция бир неча дақиқа давом этган.

Фаоллар соқчилар постигача борган, аммо ўз йўлларини давом эттирмаган, улар мақсадлари бинони эгаллаб олиш эмаслигини айтган.

Никол Пашинян бугун, 1 март куни Хавфсизлик кенгаши мажлисини ўтказди. «Бош вазир Никол Пашинян раислигида Хавфсизлик кенгашининг мажлиси бўлиб ўтди. Ташқи ва ички хавфсизлик кун тартибидаги масалалар, муаммолар ва уларнинг ечимлари муҳокама қилинди», — дейилади ҳукумат хабарида.

1 март куни кечқурунга Ереванда иккита митинг режалаштирилган: 18:00 да (Тошкент вақти билан 19:00) Баграмян шоҳкўчасида мухолифат йиғилади, бош вазир Никол Пашинян тарафдорлари эса 18:30 (19:30)да Республика майдонида тўпланади.

23 февраль куни Арманистон бош вазири 1in.аm каналига берган интервьюсида 2020 йилнинг кузида Тоғли Қорабоғдаги можаро пайтида Ереван қўллаган «Искандер» ракеталари «портламаган ёки 10 фоиз қисмигина портлаган»ини айтган. Yerevan Today нашри журналистлари Арманистон Қуролли Кучлари Бош штаби бошлиғининг биринчи ўринбосари Тиран Хачатряндан ушбу баёнотга изоҳ беришни сўраганида, у узоқ кулган ва «бўлиши мумкин эмас» деб жавоб берган. Шундан кейин у Никол Пашиняннинг таклифига биноан ишдан бўшатилган.

Бу воқеадан кейин Арманистон Қуролли Кучлари Бош штаби мамлакат бош вазири Никол Пашинян ва ҳукуматнинг зудлик билан истеъфога чиқишини талаб қилди. Баёнотга имзо чеккан 40 нафар юқори мартабали ҳарбий хизматчининг фикрича, Хачатрян «юзаки ўйланган ва асоссиз сабабларга кўра» ишдан бўшатилган.

Никол Пашинян ҳарбийларнинг баёнотига жавобан Facebook орқали мазкур баёнотни «ҳарбий тўнтаришга уриниш» деб ҳисоблаётганини маълум қилди ва ўз тарафдорларини намойишга чиқишга чақирди. Пашинян, шунингдек, ҳарбийлар баёнотига имзо чеккан Бош штаб бошлиғи Оник Гаспарянни ҳам лавозимидан озод қилганини айтди.

Аммо Арманистон президенти Армен Саркисян бош вазир Никол Пашиняннинг Қуролли Кучлар Бош штаби бошлиғи Оник Гаспарянни ишдан бўшатиш ҳақидаги таклифини имзолашдан бош тортди. Бош штаб бошлиғини ишдан бўшатиш ҳақидаги буйруқ лойиҳасини президент аппарати ўрганиб чиққан ҳамда ҳуқуқшунослар ва экспертлар билан батафсил муҳокама қилинган. Улар ташаббус «бутунлай Конституцияга зид» деган хулосага келган.

Шундан кейин Никол Пашинян президент Армен Саркисянга Бош штаб бошлиғини ишдан бўшатиш ҳақидаги арзномани қайтадан юборганини маълум қилди.

2020 йил 10 ноябрь куни Тоғли Қорабоғ бўйича битим имзолангани, унга кўра Арманистон бир қатор ҳудудларни Озарбайжонга топширгани ҳақида хабар берилган эди. Мухолифат Пашиняндан «хоинлик» шартномасини имзолагани сабабли истеъфога чиқишни талаб қилди. Шундан сўнг бош вазир истеъфога чиқишга тайёрлигини маълум қилди. Ўшандан буён мамлакатда бош вазирга қарши намойишлар давом этиб келмоқда.