Yengil vazn toifasida UFC chempioni Habib Nurmagomedov (29-0) bloger va MMA jangchisi Magomed Ismailov bilan bo‘lgan suhbatda Toni Fergyuson haqidagi fikrlari bilan o‘rtoqlashdi.
— Habib, har bir jangingdan keyin ayrim muxlislar g‘alabangni tan olmaydi va munosib jangchi bilan kurashmaganingni aytadi. Masalan, Getji bilan bo‘lgan jangdan keyin ham “kelishilgan jang” va shunga o‘xshash gap-so‘zlar qilindi. Aytchi, o‘sha toifa muxlislar tan olishi uchun qaysi raqibga qarshi chiqishing va uni mag‘lub etishing kerak? Ya’ni, o‘sha divizionda tengi yo‘q ekaningni hamma tan olishi uchun kimni yengishing kerak edi?
— Balki, bu Toni Fergyusondir. Ammo qasam ichaman, men uni hech qachon yuqori darajadagi jangchi deb hisoblamaganman. U juda yaxshi harakat qilgan, biroq men uni hech qachon top-jangchi deb bilmaganman.
Hech qachon 37 yoshda yengil vazn toifasida eng yaxshilardan bo‘lolmaysan. Buni shu kungacha hech kim uddalay olmagan va bu Habibning ham qo‘lidan kelmaydi. Bu fikrimni hech kim o‘zgartira olmaydi.
2016-yildan beri u Kevin Li, Edson Barboza, Entoni Pettis va Donald Serrone bilan jang qildi. Ortda qolgan to‘rt yil ichida bu 4 nafar jangchida umumiy miqdorda 20 ta mag‘lubiyat bor. U so‘nggi besh yilda yaxshi raqib bilan jang qilmadi, hozir esa Toni yosh va top-darajadagi jangchilar — Charlz Oliveyra hamda Jastin Getji bilan to‘qnash keldi. Ular esa Tonini xuddi maktab bolasidek masalasini hal qilib qo‘ydi. Har ikki jangda ham uning raqiblari mutlaq ustunlik bilan g‘alaba qozondi.
U bilan qanday to‘qnash kelsam ekan deb juda ko‘p o‘ylardim, buni orzu qilardim. Gap-so‘zlarsiz masalani jangda hal qilishni istardim. Biroq yaratgan buni xohlamadi. Goh men kasalxonada o‘lim yoqasiga kelib qoldim, gohida u operatsiyani boshdan kechirdi. Xullas, taqdirga bitilmagan bo‘lsa, sen unga qarshi borolmaysan.
Bu sen nazarda tutayotgan jang bo‘lishi mumkin edi. Biroq shu bilan birga unga qarshi jangimdagi yaqqol ustunlikdan keyin yana o‘sha gap-so‘zlar bo‘lardi. U turib jang qilishda ham menga hech narsa qila olmasdi, parterga esa xuddi muzda toygandek kirib ketardim, — deydi Habib.
Eslatib o‘tamiz, Habib va Fergyuson o‘rtasidagi jang turli sabablarga ko‘ra besh marta bekor qilingandi.
Mavzuga doir:
Izoh (0)