Vazirlar mahkamasi qarori bilan Baxtiyor Botirovich Xudoyberdiyev Moliya vazirligi huzuridagi Davlat asillik darajasini belgilash palatasi boshlig‘i etib tayinlandi. Bu haqda Adliya vazirligi xabar bermoqda.
Shu vaqtgacha ushbu lavozimda Ravshan Erbekovich Umarov ishlab kelayotgan edi.
Eslatib o‘tamiz, Davlat asillik darajasini belgilash palatasi Prezidentning 2019-yil 18-maydagi farmoniga asosan Moliya vazirligi tasarrufiga o‘tkazilgan.
Quyidagilar Davlat asillik darajasini belgilash palatasining asosiy vazifalari hisoblanadi:
- qimmatbaho metallar va qimmatbaho toshlar bilan bog‘liq faoliyat sohasida davlat siyosatini ishlab chiqish va uni amalga oshirishda ishtirok etish;
- mineral xomashyodan qimmatbaho metallarni texnologik jarayonlarda, qayta ishlashda kompleks maksimal ajratib olish, ishlab chiqarish, qimmatbaho metallar va qimmatbaho toshlardan oqilona va tejamli foydalanish, shuningdek, qimmatbaho metallar va qimmatbaho toshlardan yasalgan buyumlarni sotib olish va sotish ustidan nazorat qilish;
- qimmatbaho metallar va qimmatbaho toshlar bilan bog‘liq faoliyat sohasida qonun hujjatlariga rioya qilinishi ustidan davlat nazoratini amalga oshirish;
- sotishga mo‘ljallangan qimmatbaho metallar va qimmatbaho toshlardan yasalgan zargarlik buyumlarining asillik darajasini aniqlash va ularga O‘zbekiston davlat tamg‘alari qo‘yilishini ta’minlash.
Izoh (0)